Ukiut qulit ingerlanerini aatsaat taama issitsigivoq

Nunarsuarmi silap kiatsikkiartornera nunarsuarmioqatigiit oqallisigileruttoraat, nunatsinni ukiut qulit ingerlaneranni ukiormanna ukiuunera aatsaat taama issitsigisoq, Danmarkimi aviisimi Jyllands-Postenimi allaaserinnittoqarpoq. Qeqertarsuup Tunua ukiut arlallit ukiuunerani sikusanngeriarluni, massakkut meterip affaanik issussusilimmik sikuvoq.
Allattoq Mads Lynge
januaarip 17-at 2008 09:05

- Ukiortaap nalaani 26 gradit angullugit issittarpugut. Ukiut qulit ingerlaneranni aatsaat taama issitsigaagut, Ilulissani borgmesteri Anthon Frederiksen Jyllands-Postenimut taama oqarpoq.

Anthon Frederiksenip aamma oqaatigaa 1996-ip kingornagut ukiormanna aatsaat taamak sikuutigalutik.

- Sikunerata kinguneranik immakkut angallanneq uninngavoq. Kisianni tamanna qimussimik aalisartunut iluaqutaavoq, Anthon Frederiksen oqarpoq.

Nunarsuarmi silap kiatsikkiartornerata sammineqarnera Ilulissani ilisimaarilluarpaat, tassami ukiuni kingullerni ministerit naalakkersuisullu siuttui akimasuut, sermersuarmik aakkiartortumik takorusuttut imaaginnavillutik takkussuummata.

- Qularutissaanngitsumik nunarsuaq kiatsikkiartorpoq, Ilulissanilu sermip iigartartup avammut killinga tunuaraluttuinnarpoq. Taamaattorli sermeq iigartartoq ukiut hunnorujut ingerlaneranni siuaamisarlunilu tunuaamisarpoq. Uagut kalaallit ukiuni tuusintilinni pissutsit tamakkua, tassa ukiut ilaanni issinnerusarnera ukiullu ilaanni issikinnerusarnera naleqqussarfigiuarsimavavut, Anthon Frederiksen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq