Ukiut qulikkaat kiannerpaaffiusut
Ukiut qulikkaartut atoqqammikkavut aamma 1930-kkunnut aamma 1940-kkunnut kialluartutut taaneqakkajuttunut sanilliullugit kiannerupput, tassami 0,7 gradinik kiannerugamik.
Misissueqqissaarnerit ilaatigut qallunaanit, Tulunnit, Amerikamiunillu ilisimatuunit suliarineqartut, atuagassiami Environmental Research Lettersimi saqqummiunneqarput.
- Kitaata sineriaani sumiiffiit ilaanni ukiuni qulikkaartuni kingullerni aasaanerani kiassuseq 2-4 gradinik kiannerusarpoq sinerissallu ilaani ukiuunerani 10 gradit angullugit kiannerusarluni. Tamanna annertuvoq, John Cappelen DMI-meersoq oqarpoq.
Taama misissuinermi saqqummersitsisut ilaata silap pissusaanik issittumillu ilisimatuup Sebastian Mernildip taama ineriartortoqarnera ernumanartoqartippaa, tupaallaatiginaguli.
Gassimik silaannarmik kissakkiartortitsisartumik mingutsitsineq anneruleriartuinnartillugu silap kiatsikkiartornissaa naatsorsuutigisassaasoq, taanna isumaqarpoq.
Tamanna sermersuarmut Nunatsinnilu sermeqarfinnut sunniuteqangaatsiarsimavoq.
Ukiumi 2010-2011-mi Nunatsinni sermeq aatsaat taama aakkiartortigaaq: Ukiormi taanna sermersuaq 430 gigatonimik milleriarpoq - imaluunniit 430 kubikkilometerinik milleriartoq, Sebastian Mernildip ilisimatitsissutigaa.
