Ukiut marluk qaangiuttut: Coronamik tunillatsissimasut 191-it napparsimmavimmi uninngasimapput 21-llu toqullutik

Coronamik tunillatsissimasut amerlanerpaammata qaammatit marluinnaat qaangiupput. Maannakkuugallartorlu tuniluunneq qaangiussimalerpoq.

Napparsimmavimmi uninngasoqarunnaarpoq, ukiunilu marlunni atuleqqittuartunik killilersuisoqareersorlu killilersuutigineqartoq ataasiinnaavoq.

Tassalu ukioq manna qaammatit pingasut siulliit ingerlaneranni amerlanerpaat quersorlutik, kakkilertallutik kissarneqarlutillu mattusimareerneranni Nakorsaaneqarfimmit killiffik pillugu nalunaaruteqarneruvoq.

AAMMA ATUARUK Nunatta nakorsaanera: Tuniluunneq qaangiutilerpoq, ukiamulli uteqqissagunarluni

Tunillatsissimasunit 191-it napparsimmavimmi uninngasimapput, PCR-imik misissortinnikkut paasineqartut 12.055-iupput – tamatumalu saniatigut nalunaarsorneqanngitsunik tunillatsissimasorpassuaqarpoq.

Nakorsaaneqarfiup innuttaasut amerlanerpaartaat tunillatsereersimassasut natsorsorpaa. Coronap ilaata tuniluutianerusup, Omikronip allannguutaata BA.2-p qaammatini kingullerni pingasuni tuniluunnerpaaffigisaani amerlanerpaat tunillatsipput.

Kisitsisit ilisimaneqanngitsut

• Marsip ulluisa 31-t tikillugu coronamik tunillatsissimasut 191-it napparsimmavimmi uninngasimapput. 
• Taakku 14 procentiisa corona pingaarnertut pissutigaat.
• Tunillatsissimasunit 101-t Nuummi napparsimmavimmi uninngapput, Sisimiuni 20-t, Ilulissani 13-it, Aasianni qulit, Qaqortumi qulingiluat, Maniitsumi qulingiluat, Nanortalimmi arfineq-pingasut, Upernavimmi arfinillit, Uummannami arfinillit, Paamiuni tallimat, Narsami pingasut Qasiannguanilu ataaseq.
• Napparsimmavimmut unitsinneqartut 191-it agguaqatigiissillugit 52,7-inik ukioqarput.
• Meeqqat 18-it inorlugit ukioqartut covid-19-imik tunillatsissimanertik pissutigalugu napparsimmavimmut unitsinneqartut katillugit 15-iupput.
• Napparsimmavimmut unittunit 96-inik ukiulik utoqqaanerpaavoq.
• Napparsimmavimmut unitsinneqartut 53 procentii arnaapput.
• Covid-19-imik tunillatsinnermi kingorna toqusut katillugit 21-upput. Taakku 47,6 procentiisa covid-19 pingaarnertut toqqutigaat.
• Toqusut ukiui agguaqatigiissillugit 80,3-nik ukioqarput.
• Inuusunnerpaaq 68-inik ukioqarpoq.
• Ukioqqortunerpaarlu 92-inik ukioqarluni.

Nuummi misissuisarfik apriilip ulluisa aallaqqaataanni matuvoq. Maanna PCR-imik misissortinnissamut 344400-imut nalunaaqutaq 08.00-ip 15.00-illu akornanni sianertoqarsinnaavoq, tamanna Naalakkersuisut aalajangigaraat.

Sinerissap sinnerani nakorsiartarfimmut napparsimmavimmulluunniit piffissamik inniminniisoqarsinnaavoq.

PCR-imilli misissortissinnaaneq coronamik tunillatsinnikkut napparsimarululernissamut aarlerinaateqartunut kisimi atuuppoq – imaluunniit angalasussat nunanut isernissamut tunillatsissimannginnermik uppernarsaateqartussat aamma misissortissinnaapput.

Killilersuutit nungutaat suli atuuttoq nunatsinnut angalaniartut nunatsinnilu najugaqanngitsut akiuussutissamik kapitissimanissaannik piumasaqaateqarneruvoq. Killilersuut taanna 2022-mi juunip ulluisa aappaanut atuukkallarpoq.

Coronamik Akiuineq – maannakkutut iluseqartoq 2021-mi decembarip ulluisa qulinganni pilersinneqarpoq, taannalu juunip ulluisa 30-anni matussaaq.

Corona Hotline ulluinnarni nal. 8-mit 16-imut suli ammasarallassaaq.