Tassaarsuaq Ukiut marluk qaangiutilerput
- Ukiut marluk matuma siornatigut tassaarsuaqarneranit nunaqarfiit marluk eqqugaasut nalliussillugit ataatsimuualaartussaavugut, Nuugaatsiami Illorsuarnilu nunaqarfinni aqutsisuni siulittaasoq Karl Peter Møller oqarpoq.
Karrat Kangerluanni qaqqamit siornaak juunip ulluisa 17-anni sisoortoqarmat tassaarsuaqartitsivoq.
AAMMA ATUARUK Ukiumik ataasinngortorsiornermi Uummannami pisussanut pilersaarutit
AAMMA ATUARUK Uummannami eqqaaniaasoqarpoq
Nuugaatsiaq eqqugaammat inuit sisamat ajunaarput illullu saavigussaallutik.
Ajunaarnersuaqareerneraniit ukiut marluk qaangiunneranni Nuugaatsiarmiut Uummannami iliveqarfimmi unnugu nerereernerup kingorna naapeqatigiissapput.
Ajunaartunut eqqaassutissiat naasunik ilisiffigineqassapput taava aamma tussiaqatigiittoqassaaq kingornalu Edvard Krusep atuarfiata aulaani kaffisoqatigiittoqassalluni. Nuugaatsiami Illorsuarnilu nunaqarfinni aqutsisuni siulittaasoq Karl Peter Møller KNR-imut taama paasissutissiivoq.
Pisoq Nuugaatsiarmiut ilaannut ulloq manna tikillugu tamaviaarnarsinnaasarpoq.
Oqaloqatigiilluartarnissarli Nuugaatsiami kommunefogediusimasup Mikkel Jeremiassenip pingaartitaraa:
- Ammaffigeqatigiilluta, tapersersoqatigiilluta, ikorfartoqatigiilluta. Aamma uagut ilaqutariinni oqaasinnguinissaq assut pingaartipparput. Qiaqatigiittarpugut aamma nuannersunik taavani atortarsimasatsinnik eqqartuisarpugut. Maannamut suli akiuuppugut, Mikkel Jeremiassen oqarpoq.
Ajunaarnersuaqarmat Nuugatsiarmiut Illorsuarmiullu 174-it nunaqarfimminnit qimagutitinneqarput.
AAMMA ATUARUK Saqqap avannaani nuna sisoorpoq
AAMMA ATUARUK Illorsuarmiut angerlarusullutik akerliussutsimik takutitsisut
Nunaqarfiujunnaartumi Illorsuarni erfalasoq Inuiattut Ullorsiornitsinni ullaakkut arfineq-pingasunut amuneqassaaq.
Illorsuarmiummi ulloq nunagisaminni nalliussiniaraat, Illorsuarneersoq Dorthe Qvist Jerimiassen oqarpoq:
- Igaasarluta, tamululluta, sammisaqaqatigiilluta aliikkusersuullutalu. Taavaniikkaangatta ullorsiortarnitsituut ullorsiorusuppugut, qimakkatsigulli taama ittumik aatsaat aaqqissuussilerpugut.
Qaqqap sisooqqissinnaanera suli aarleqqutigineqarnera eqqumaffigigitsik, Dorthe Qvist Jerimiassen oqarpoq.
