Ukiut marluk atuarsinnaaneq ilinniarpaa
Atuarsinnaanngikkaluarluni atugarissaartunngortoqarsinnaavoq, taamaattorli atuarsinnaagaanni iluaqutaaneruvoq. Angut Kiinamiu 62-inik ukiulik Liang Yongnian pillugu taama oqartoqarsinnaavoq.
Allattoq Elisa Isaksen
Taanna qisuleriffimmik neriniartarfimmillu pigisaqarpoq, taakkulu iluaqutigalugit Yongnian millionærinngorsimavoq, taannali aatsaat qanittukkut atuarnermik ilinniarpoq, tassami ukiuni marlunni atuartuuniarluni aalajangersimagami.
- Neriniartarfiutinni ukiuni 20-ni ineriartortoqarsimanngilaq, naak neriniartarfiit allat ineriartorsimagaluartut. Tamanna tassaavoq angutip atugartuunngorsarsimasup aamma angutip atuarsinnaanngitsup assigiinngissusaat, Yongnian Kiinami aviisimut Global Times-imut taama oqarpoq.