Ukiut arfinillit pineqaatissinneqarsinnaavoq

Savik toqutaasup aavanik aattalik tassaavoq arnamut 47-nik ukiulimmut, aapparminik toqutsisimasutut pasisamut, unnerluussisussaatitaasumit eqqartuussivimmi uppernarsaatitut atorneqartussaq.
Allattoq Louise M. Kleemann
novembarip 10-at 2011 14:19

Unnerluusisussaatitaasup piumasaqaataa eqqartuussisumit malinneqassappat arnaq 47-nik ukiulik ukiuni arfinilinni pineqaatissinneqarsimasunut inissiisarfimmiittussanngorlugu eqqartuunneqarsinnaavoq.

Arnap aapparisaa 38-nik ukiulik aappariit oqqannerisa kingorna toqungasoq septembarip sisamaani nassaarineqarpoq.

Aak savimmi toqutsissutitut atorneqarsorisami nassaarineqartoq toqutaasuminngaanneersoq teknikkikkut misissuinermi paasineqarpoq.

Kisianni inuup sananeqaataanut ilisarnaatitut takussutissamik imaluunniit inussat ipaasa inaannik arnap toqutsisuuneranik uppernarsaatitut atorneqarsinnaasunik politiit misissuinerminni nassaanngillat.

Arnaq aapparminik toqutsisimasutut unnerluussummut aamma pisuunnginnerarpoq. Illuatungaanilu politiit suliamut atatillugu inummik allamik pasisaqarnissamik tunngavissaqarsimanatik.

Arnamik 47-nik ukiulimmik eqqartuussineq  Nuup eqqartuussiviani sisamanngornermi novembarip 17-iani pissaaq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq