Ukiut 60-it qaangiummata Danmarki sorsunnersuarmit aniguisitaavoq

Ukiut 60-it matuma siorna Danmarki nunarpullu sorsunnersuarmit aniguisitaavoq. Jørgen Fleischer taamani napparsimavimmi sakiallulluni uninngavoq, ullorlu eqqaamalluarlugu oqaluttuarpoq.

-Ulloq Danmarkip aniguisitaaffia tusarparput BBC-ip radio-a aqqutigalugu nalunaarutigineqarmat. Tupinnarluinnaqqissaartumillu taamani utoqqaat meeqqatut nuannaarput. Ullaakkut itileriallaratta radioqarfiup napparussua 52 meter-isut portutigisoq danskit erfalasuannik erfalasorujussuarmik erfasulerneqarsimasoq, Jørgen Fleischer oqaluttuarpoq.

Taamani Nuup qamutileqarfiani inuppassuit katersuussimapput, qamutilittartoqarlunilu. Eske Bruun sorsunnersuup nalaani kisermaassilluni naalakkersuisuusoq oqalugiarsimavoq, Danmarkimut atassuteqalerneq eqqartorlugu nuannaarutigalugulu. Spejderillu aamma erfalasulisaarlutik peqataasimapput.

Ullorlu tamanit pingaartinneqartariaqaraluartoq Jørgen Fleischer-ip oqaatigaa.

-Taamani utoqqarnut pingaaruteqartorujussuuvoq, massakkulli inuusuttut akornanni Danmarkimut atassuteqarneq soqutigineqarunnaarsimavoq, nammineerusunneq ullumikkut kisimi eqqarsaatigineqarami. Taamaammat isumaqanngilanga ulloq taanna ullumikkut inuusuttut pingaartillugu pingaartissinnaagaat, Jørgen Fleischer oqarpoq.

Jørgen Fleischer-ilu isumaqarpoq ulloq pingaartinneqartariaqaraluartoq oqaluttuarisaanermut ilaammat.