Ukiut 27-it pisuunngikkaluarluni parnaarussaasimavoq
Angutip pisuunnginneranut uppernarsaatit ilitsiveerunneqarsimagaluartut nassaarineqaqqikkallartillugit angut ukiunik aqqanilinnik kingusinaarluni iperagaavoq. Arnaq pinngitsaalineqariarluni toqunneqarsimasoq Southhamptonimi, 1979-imi decembarip tallimaani nassaarineqarmat, angut eqqarsartaatsimigut innarluutilik, Shawn Hudson taamani toqutsisuulluni nassuerpoq. Kingusinnerusukkut kingusinaarluni nassuernini tunuartikkaluarpaa, 1982-imilu eqqartuunneqarami inuunini naallugu paarnaarussassanngortinneqarpoq, Hudsonilli pinngitsuunini attattuarpaa. Taamani inuup sananeqaatai eqqartuussivinni uppernarsaatitut atorneqarsinnaanngillat. 1998-imili Hudsonip eqqartuussissuserisuata misissuinerit kingulliit misissoqqissaartikkaluarmagit, misissueqqissaartartut inerniliinerat tammaaneqariarmat, suliaq puigoqqiinnarneqarpoq. Hudsonili siorna nutaamik eqqartuussissuserisortaarmat, taassuma 1998-imi misissuinernit inerniliinerit ujartulermagit kukkunikkut toqqorsivimmut ilineqarsimasut nassaarineqarmata, Hudson ukiunik aqqanilinnik kingusinaarluni ippassaq iperagaavoq. Hudson, ukiuni 27-ni pinngitsuulluni paarnaarusimaneqareerluni ippassaq iperagaangami timikkut sanngiillisimagaluaqaluni nuannaaqaaq. Tuluit Nunaanni pisimasut tassunga assingusut Hudsonimut tunngasoq alianarnersaraat.
USA-mi New Mexicomi pillaatissiissutitut toqutsisarneq ippassaq inerteqqutaalersinneqarpoq, pisuunngitsut toqunneqariataarsinnaanerat aarleqqutigineqarmat.
Ukiut kingulliit 20-t ingerlaneranni inuit 234-it pinerlussimasutut pasineqartut, sananeqaataat misissorneqareermata iperagaapput.
Pinerlussimasutut pasineqartut agguaqatigiissillugu ukiuni aqqaneq marlunni paarnaarussaaqqasimapput, tassa pinerlunnernut pisuunngikkaluarlutik.
