Ukiut 10-t sulisimaneq asuliinnarsinnaavoq
Nunatta ernganik tunisassiornissami, KNI kisermaassitinneqalissappat, nunatta ernganik tunisassiorniarlutik suliniareersut ilaatigut Greenland Ice Cap Productions, Narsamiittoq uppernassuseerutissasoq, Greenland Ice Cap Productions-imi siulittaasoq Kaj Egede oqarpoq.
Imermik tunisaassiornissamik soqutiginnillutik 300 millioninik aningaasaleeqataarusullutik Schweiz-iminngaanneersut ThoCon, ukiut marluk matuma siorna Greenland Ice Cap Productions-imut saaffiginnissimapput. Sulialli kinguarsartuarneqarneratigut ThoCon-ip tunuartilernissaa ilimanarsinnaasoq, Kaj Egede oqarpoq, tamannalu pissappat nunatta ernganik tunisassiulernissami ukiuni qulini suliniarsimanermi aningaasartuutaareersimasut 20 million koruunit asuliinnartinneqarsinnaapput.
- Qinnuteqaat pilersaarusiorluagaq itigartinneqassagaluarpat uppernassuserput annikilleriarujussuassaaq, aammalu nunanit allanit nunatta aningaasaliiffissatut pilerinassusia ukiorparujussuarni qarmarniarsarisimasarput maangaannassaaq, taama Kaj Egede oqarpoq.
ThoCon-ip Greenland Ice Cap Productions-illu pilersaarutaat malillugu Qeqertarsuarmi inunnik 50-nik suilisoqarluni imermik tunisassiulersinnaaneq pilersaarutaasimagaluarpoq Qeqertarsuulli kommunea siunnersuuteqareerpoq ThoCon-p qinnuteqaataa itigartinneqassasoq.
