Ukiup qaammataani siullerni pingasuni Grønlandsbanken sinneqartoorpoq
Sinneqartoorutit siorna piffissami tamatumani naatsorsuutinut naleqqiullutit 3 millionit koruuninik pitsanngoriaateqarput.
Aningaaseriviup qullersaasa sinneqartooruteqarnertik naammagisimaarpaat - aamma naak ernianit akiliuteqartitsisarnernillu isertitat siorna ukiup qaammataanni siullerni pingasunut sanilliullugit 4 millionit koruuningajannik ikileriarlutik 55 millionit koruunit missaanniileraluartut.
Ukiup qaammataannut siullernut pingasunut nalunaarusiami oqaatigineqarpoq, aningaaseriviup Nuummi qitiusumik allaffeqarfittaavanut aningaasartuutit amerleriarsimasut. Taamaattorli Grønlandsbankip aningaasaatai tigoriaannaat naammagisimaarneqartorujussuupput, tassami tigoriaannagassatut pigineqartussat inatsisitigut piumasarineqartut 152,1 procentimik sinnerlugit pigineqarmata.
Aningaaseriviup qullersaasa ukiormanna 95 aamma 115 millionit koruunit missaannik sinneqartoornissartik naatsorsuutigaat.