Ukiup ingerlanerani: Politiit hasheerniat pilersuisuinik arlalinnik tigusarinnipput

- Pilersuisartut ilumut pisarisimavagut, tamanna qularutigisassaanngilaq, taama politiit ikiaroornartulerisartuisa ittuat Finn Jeppesen naqissusiivoq. Angutit marluk angallataanniit hashimik 118 kiilunik ukioq manna arsaarinnissimaneq kisitsisinik qaffaarujussuaqataasimavoq. Arsaarinnissutigineqartullu procentinngorlugit agguataassagaanni angallammi arsaarinnissutigineqartut kisitsisit katissagaanni 80 procenterisimavaat.

Hasheerniat pilersuisui tigusaasut arfiniliusuni sisamat pineqaatissinneqareersimapput, marlullu suli pineqaatissinneqarnissartik utaqqillugu.

Hasheerniat pilersuisui aningaasanik isaatitsinerpaajusarput, taakkuuppullumi Danmarkimi hashinik pilersuisunut attaveqaataasut, nunatsinnilu aqqusinerni tuniniaasut pilersugarisuuaat.

- Hasheerniat pilersuisuat aningaasanik isaatitsinerpaajusarpoq, taannami aqqusinerni tuniniaaneq ajorpoq, Christianimiluunniit hashimik pisiniartartuunani, pilersuisartormi tamakkuninnga aallussisuusunik sulisoqartarpoq, taama Finn Jeppesen oqaluttuarpoq.

Hashimik pilersuisut kikkuuneri politiinit sivisuumik ilisimaneqareersimavoq.

- Siornatigumulli naleqqiullugu ilumut hashimik pilersuisuunerat maannakkut uppernarsaatissaqartissinnaasimavarput. Finn Jeppesen naggasiivoq.