Ukiuni tulliuttuni qulini iluarsaaqqinneq, sinerissamut qanittumi aalisarnermi pisariaqarpoq

Taama isumaqarpoq KNAPK-p siulittaasua Leif Fontaine, sinerissamut qanittumi imaatigut inuutissarsiornerup ineriartortinneqartariaqarneranik qulequtsiilluni, naalakkersuinermik suliallit nunattalu aqunneqarneranut akisussaasut oqarfigalugit, inuutissarsiutip ineriartortittuarnissaata uninngatiinnarnissaanut inuiaqatigiit akissaqanngitsut.
Allattoq Elisa Isaksen
septembarip 27-at 2009 13:54

Ukiuni qulini iluarsaaqqinnissami, KNAPK-p siulittaasuata eqqarsaatigisaani, aalisariuteqassuseq aalisagaqassutsimut naleqqussarneqartariaqarpoq aamma angallatikkaartumik pisassiisarneq aalisariaatsini tamani eqqukkiartuaarneqartariaqarluni. Aamma KNAPK-p siulittaasuata Naalakkersuisut siulittaasuat isumaqatigaa oqarmat, tunisassiorfiit ilaat namminersortunngorsarneqartariaqartut.

Ukiuni qulini iluarsaaqqinnermi ilinniartitaaneq qaammarsaanerlu aamma imaatigut inuutissarsiutini tamani eqqukkiartuaarneqartariaqarpoq. Leif Fontaine aamma isumaqarpoq sinerissamut qanittumi aalisariuteqarneq iluarsartuunneqartariaqartoq, aalisariutit pisoqalisut piiarlugit, aalisariutinik sinerissamut qanittumi ullutsinnut siunissamullu naleqquttunik taarsersorlugit.

KNAPK-p siulittaasuata aamma erseqqissarpaa, sinerissamut qanittumi aalisarneq silap pissusaata allangoriartorneranut naleqqussarneqartariaqartoq.

- Ukiuni makkunani silap, pinngortitap uumassusillillu pissusaasa allanngoriartornerat tamatumalu kingunerisaanik imaatigut inuutissarsiuteqarnermi pissutsinik allanngoriartortitsisoq malillugu uumassusilinnillu atorluaanissaq siunertarlugu Nunatsinni imaatigut inuutissarsiornerup naleqqussartuarnissa partiit suleqataaffigisariaqaraat, KNAPK-p siulittaasua Leif Fontaine isumaqarpoq.