Ukiuni tallimani meeraaqqat malinnaaffigineqartassapput

Ittoqqortoormiormiut nerisartagaasa arrortinneqarsinnaanngitsunik akoqarpallaarneri innuttaasunullu sunniutaasartut misissorneqarnerunissaata anguneqarnissaa qanoq aqqutissiuunneqassanersoq pilersaarusiorneqarpoq.

Kitaani najugalinnut sanilliullugit, Ittoqqortoormiuni najugallit aavi arrortinneqarsinnaanngitsunik akoqarnerpaanut ilaapput, ukiunilu arlaqalersuni taamaattoqarnera ilisimatuunit ernummatigineqarpoq. Peqqissutsimut Naalakkersuisoq Asii Chemnitz Narup Ittoqqortoormiuniit tikeqqammersoq ima oqarpoq:

- Nunatsinni tamarmi, arrortinneqarsinnaanngitsut malinnaaffigilluarneqartupilussuupput. Ilaatigut aaviisarnikkut malinnaaffigineqarlutik. Illoqqortoormiunili immikkut ittumik aalajangigaqarpugut, neqerooruteqarniarlutalu, ilaatigut ukiaminngaanniit naartusut aaversinneqartalissasut meerartaaraangatalu meeraaqqat tallimanik ukioqalernissaasa tungaannut aaviisarnikkut malinnaaffigineqarnerisigut. oqarpoq nangillunilu.

- Qangali suleqatigisimasagut, Center for Arktisk Miljø Medicin Århusimiittoq suleqatigissavagut. Meeqqat ukiuni tallimani malinnaaffigineqarlutik misissuineq ingerlanneqarpat, paasissutissat nutaat pigilissavagut, qanorlu ingerlariaqqinissamut paasissutissat takutitsiumaarput. Aamma Naalakkersuisutut pisussaaffigaarput nunatsinni malittareqqissaassallugit, inuussutissat aqqutigalugit timitsinnut sunniuteqarnerlussinnaasut arrortikkuminaatsut ilanngullugit.

Aaviisarnerit ingerlaavartunngortinneqarnerisa saniatigut, nakorsaq Henning Sloth paasisanik kingullernik paasisitsiniaajartorluni Ittoqqortoormiuliassaaq.