Ukiuni qulini utaqqisuniipput

Kalaallit Nunaanni kiguserisartorpassuit kigutiluttulluunniit naalulersarput, kigutaasartaarniarlutik kigutileriffimmi inissaqalernissaminnik utaqqerujussuartariaqartaramik.

Naalulersarnerannut pissutaasarpoq, kiguteqanngikkunik soorunami iluamik tamuasinnaannginnamik imerpalasuinnarnik imaluunniit iffia’qaqortumik qalipaqanngitsumik nerisariaqartariaqalersaramik.

- Sullitarpassuavut naamikkut ippigusuuteqalersartuttakusinnaasarpavut, tassa nerisaat assigiiaarpallaalersaramik, Sisimiuni kigutileriffimmi kigusiortoq, Henriette Martinsen oqarpoq.

- Naalulersartut suli amerliartorujussuarnissaat ernummatigaarput. Inuimmi tusindtilippassuit kigutaasartaarnissaminnut Kalaallit Nunaanni utaqqipput. Tamaakku ilaat ukiut qulit missaanni utaqqisimapput!

Kalaallit Nunaanni kigutaasiortunik kigutilerisunillu amigaateqarnerujussuaq taama utaqqisoqartigineranut pissutaavoq, kigutilerisutummi ilinniarsimasut affaasa missaannai inuttaqarput.

Kigutileriffimmi ulapputtunut inuit marluk iserpata, aappaa kiguserisoq aappaalu kiguteqanngitsoq kisiannili anniaateqanngitsoq, taava anniartoq salliutinneqartariaqartarpoq, Sisimiuni kigutaasiortoq Henriette Martinsen taama oqaluttuarpoq. Kiguteqannginneq annernanngikkaluartoq, inuunermut sunniutipiloqartarpoq. Soorlu isikkorissusermut sunniuteqartarpoq, oqareernitsitullu tamuasinnaajunnaarnermik kinguneqartarluni. taamaalillutik inuit imerpalasuinnarnik nerisaqartariaqalersarput imaluunniit iffia-qaqortunik qalipaqanngitsunik assigisaannilluunniit.

Peqqqinnissaqarfiup ajornartorsiutit aaqqiivigerusullugit, Kalaallit Nunaanni kigutaasiortut sisamat isumaqatiigiissusioqatigisimavaat – ukiuni tulliuttuni marlunni, illoqarfinnut assigiinngitsunut, utaqqisunik ikilisaajartorumaartut.