Ukiuni 21-nit sivisunerusumik parnaarussaasinnaavoq
Norgemi pinerliinerni pisuutinneqarnermi ukiut 21-it parnaarussaanermik kinguneqartaraluarpoq.
Norgemi politiit maanna isumaliutigilerpaat, Breivik paragrafi nutaaq pinerliinernut tunngasoq najoqqutaralugu pillagassanngortissallugu. Paragrafi taanna tunngavigalugu Breivik ukiuni 30-ini parnaarussaasinnaavoq.
Paragrafi nutaaq 2008-mi atuutsinneqalersoq, inuiannut pinerliinermut tunngavoq, politikkikkullu eqqarsartaaseq tunngavigalugu inunnik politikkikkut allatut eqqarsartaasilinnik malersuinermut aamma tunngalluni, aftenposten.no taama allappoq.
Pinerliinermut inatsit norskit maannakkut atugaat tunngavigalugu, Breivik pineqaatissinneqartussatut unnerluutigineqarallarpoq.
Eqqartuussivimmut sassartinneqarami Breivik sapaatip akunnerini arfineq pingasuni tigummigallagassanngortinneqarpoq, pulaarneqarsinnaanani tusagassiutinillu attavigineqarsinnaanani. Tigummigallagaanermini sapaatip akunneri sisamat mattusimatinneqartussaavoq kikkunnit tamanit takuniarneqarsinnaanani.
Breivikip illersuisua oqaluttuarpoq, Breivik isumaqavissimasoq eqqartuussiviliaanneqarnermini toqutaassalluni.
- Parnaarussivimmiinneq Breivikip allatut takorloorpaa, isumaqarluni parnaarussivimmiittut tamarmik anniartinneqartartut, illersuisoq Geir Lippestad oqarpoq.