ukiumut imminortartut ikiliartunngitsut

Imminortartut amerlassusaat ukiuni kingullerni arlaqalersuni ukiumut agguaqatigiisullugu nunatsinni 50-iusarput. Nunatsinni imminortartut nunanut allanut naleqqiullugit amerlanerupput.

Imminortoqartarneranut tunngatillugu Paarisa-mit kisitsisaatigineqartut naapertorlugit, 1901-mitt 1930-p tungaanut Kalaallit Nunaanni inuit imminorsimasut katillugit 30-iupput, ukiunilu kingullerni 60-ini ineriartorfiusimaqisumi, inuit imminortartut amerliartuinnavissimapput. 1960-ikkut naajartulernerani angutit imminortartut ukiumut tallimaapput, ukiorlu allortarlugu arnaq ataaseq imminortarluni. 1980-ip qiteqqunneraniit imminortartut, amerlanertigut angutaasut, agguaqatigiisillugu ukiumut 50-iusarput, ukiunilu kingullerni 20-ini nunatsinni imminorsimasut katillugit 1300-it missaanniipput, taama oqarpoq Paarisami imminortarneq akiorniarlugu suliaqartoq Jette Eistrup.

Assersuutigiinnarlugu nunatsinni illoqarfik akunnattoq 1300-inik innuttaasoqartarpoq, ukiunilu 20-ini kingullerni, nunatsinni illoqarfiit akunnattut amerlaqatai nunatsinni imminorsimapput. Sapaatip akunnerani uani imminortarneq ratiuaviisimi sammineqassaaq.