Qeqertarsuup Tunuani pisassiissutit: Ukiumut 10%-inik ikilisarnissaat nalilersuiffiginiaraat

Naalakkersuisut 2018-imut pisassiissutinik aalajangersaanermut atatillugu aalisarnerup iluani immikkoortut arlallit aamma isumaqatigiissutigaat. Naalakkersuisooqatigiit Qeqertarsuup Tunuani sinerissap qanittuani qaleralinnik pisassiissutaasartut ikilisarnissaat ilaatigut nalilersuiffiginiaraat, ataatsimiinnermit imaqarniliami atuarneqarsinnaavoq.

Naalakkersuisooqatigiit ilaatigut aappaagumut qaleralittassiissutissat decembarip aqqarngani ataatsimiinnerminni  isumaqatigiissutigaat. Qeqertarsuullu Tunuani aappaagumut pisassiissutit, TAC, Pinngortitaleriffiup inassutigisaanit malunnaatilimmik amerlanerupput.

Immikkoortulli ilaatigut Qeqertarsuup Tunuanut tunngassuteqartut arlallit aamma isumaqatigiissutigineqarput.

Ataatsimiinnermit imaqarniliami atuarneqarsinnaavoq Naalakkersuisut isumaqatigiissutigaat:

- 2018-imi siunissamilu sinerissap qanittuani qaleralittassanut pisassiissutigineqartunut atatillugu, ingammik siunnersuiffimmi Qeqertarsuup Tunuani, pisassiissutit ingerlaavartumik 10%-inik appartinneqarsinnaasarnissaat nalilersuiffigineqassaaq, imaqarniliami tamanna atuarneqarsinnaavoq.

Tassa taamaaliortoqarnissaanik aalajangiisoqanngilaq. Nalilersuiffigineqassasorli isumaqatigiissutigineqarpoq. 

AAMMA ATUARUK Naalakkersuisut aalisagartassiinerat WWF-imit isornartorsiorneqartoq

Ataatsimiinneq naalakkersuisooqatigiinni aalassatsitsisoq

Decembarip aqqarngani ataatsimiinneq Naalakkersuisuni aalassatitsilaarpoq. Naalakkersuisunummi ilaasortat marluk, Sara Olsvig aamma Karl Kristian Kruse, ataatsimiinnermi suna isumaqatigiissutigineqarnersoq isumaqatigiissutigivissunngilaat. Sara Olsvig naapertorlugu immikkoortut pisassiissuteqarfiunngitsut, partiimi WWF-illu piumasarisimasaattut Naalakkersuisunit atorunnaarsinneqarput.

AAMMA ATUARUK Pisassiissutitaqanngitsunik aalisarfiit atorunnaassapput

Tamannali aalisarnermut naalakkersuisup Karl Kristian Krusep ilumuunngilluinnarnerarpaa.

- Inuit Ataqatigiinneersup Sara Olsvigip oqaatigaa immikkoortut pisassiissuteqarfiunngitsut atorunnaarsinneqassasut. Tamannali eqqunngilaq, politikeri Siumumeersoq KNR-imut taama oqarpoq.

Sara Olsvigip suna pissutigalugu immikkoortut pisassiissuteqarfiunngitsut atorunnaarsinneqarnissaannik aalajangertoqarsimaneranik Qanoruumut juulli sioqqutilaarlugu oqaaseqarsimanerluni akissuteqarfigerusunngilaa. Partiimi pingaartitaa. Naalakkersuisut siulittaasuata Kim Kielsenip naalakkersuisunut ilaasortaq sorleq eqqortumik oqalunnersoq aamma oqaaseqarfigerusunngilaa. 

AAMMA ATUARUK Olsvigip pisassiissutitaqarfiunngitsumik aalisarfiit atorunnaarsinnissaat pillugu oqarnera Krusep ilumuunnginnerarpaa

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!