Ukiukitsoq toqutsinermi tigummigallarneqarpoq
Politimestereqarfimmi unnerluussisussaatitaasoq, Louise Mundt Dinesen, radioaviisimut oqarpoq inuit marluk Aasianni Eqqartuussivimmi matoqqasumik killisiorneqareerlutik, aappaa ulluni 13-ini, aappaalu ulluni 26-ni, toqusup aappaanut toqutsisimasutut pasineqarlutik tigummigallarneqartut.
Tigummigallanngortinneqartup aappaa ulluni 26-ni tigummigallarneqassaaq, aappaali ulluni 13-ini. Louise Mundt Dinesen-illu tamanna tigummigallarneqartup aappaata 18-it inorlugit ukioqarneranik pissuteqarnerarpaa.
Inuit marluk arfininngormat ullaaralaakkut toqupput. Aasianni politiit imminut toqunniartoqarneranik siullermik kalerrinneqarput, nalunaaquttallu-akunnera ataaseq qaangiummat najugaqarfimmi allami kamaattoqarneranik nalunaarfigineqarlutik. Angut toqungasoq tassani siumorneqarpoq, nakorsarlu aggersarneqarmat paasineqarpoq angut toqoreersimasoq.
