Ukiortaarsiorneq politiit ulapaarfigaat

Ukiortaamut iserneq pisarnertut politiit ulapaarfigisarpaat, Aamma ukioq manna taamaappoq. Sineriak tamakkerlugu politiit ulapaarsimapput, ilaatigut angerlarsimaffinni eqqissiviilliornerit ornittariaqartarlugit, aalakoortut ikiortariallit angerlaallugit imaluunniit isertitsivimmukaallugit.
januaarip 01-at 2011 17:15

Nuummili politiit ulapinnerpaasimapput, Nunatta politeeqarfiani inatsisileritooq, Claus Lyngholm Risberg taama oqarpoq.

Nuummi imerniartarfimmi, Manhattanimi paggittoqarsimavoq, tamatuma kinguneranik inuusuttut marluk Dronning Ingridip napparsimmavissuani suliarineqartariaqarsimallutik.

Paggittoqarnerani politiit pisinnaasut tamaasa atortariaqarsimapput. Pagginnermi puiaasat aseqqukut sakkugineqarsimapput. Tamatuma kingunerani inuusuttoq toqutseriarsimasutut maanna politiinit sapaatip akunnerini sisamani tigummigallagassanngorsimavoq.

Pagginnermi inuit marluk assut ikilerneqarsimapput, aappaa qungatsimigut kilerujussuarsimalluni aappaalu isimigut puiaasap aseqquanik eqqorneqarsimalluni. Tamatuma kinguneranik taakku inuunerminnik ulorianartorsiortutut nalilerneqarsimapput, maannali politiit nalunaarutigaat ulorianartorsiorunnaarsimasut.

Sisimiuni politiit aamma ulapileraluarsimapput, kamaattoqarnerani politiit marloriarlutik saassunneqartarsimapput. Saassussisullu maanna eqqartuunneqartussanngorsimapput.