Ukiortaaq sioqqullugu angallanneq, silamit ajoquserneqarpoq
Taamaattumik Air Greenland aqagu marlunngornermi ilaasussat amerlanerpaat apuunniarlugit immikkut ittumik timmisartuussissaaq.
Assersuutigalugu aqagu ullaakkut Nuummiit Kangerlussuarmut immikkut ittumik timmisartuussisoqassaaq, taamaalilluni ilaasussat 40-t ullumi Nuummiit aallanngitsoortut, timmisartorsuarmut aqagu Danmarkiliartussamut angumersisinnaaniassammata. Ilaasussat sinneri Air Greenlandip Boeing 757-ianik, pilersaarutit najoqqutaralugit annerusumik aserfallatsaaliinermut atatillugu misissorneqaqqammersumut, pingasunngorpat immikkut ittumik timmisartuunneqassapput.
Air Greenlandip angallannermut qullersaqarfiata, aallarfissat tikiffissallu ullumi kingusissukkut erseqqinnerusumik nalunaarutigisinnaassallugit naatsorsuutigaa, aamma timmisartortitseqatigiiffiup nittartagaa www.airgreenland.gl aallarfissat tikiffissalu pillugit malinnaaffigineqarsinnaavoq.