Ukiortaap kingorna umiarsuartoqarsinnaanngilaq
Juullilernerani nunatsinni umiarsuarmik angalaniartut, aatsaallu ukiortaap kingorna angerlarniartut, timmisartumik angerlartariaqassasut, Arctic Umiaq Line-mit oqaatigineqarpoq.
Juullip ukiortaallu akornanni nunatta iluani inuit umiarsuarmik angalaniartut, Arctic Umiaq Line-mit nalunaarfineqarsimapput, ukiortaamiit angalaniarnerat unitsinneqartariaqarsimasoq.
- Inuit bilitsinik inniminniisimagaluartut amerlanerit paasinnilluarput, Arctic Umiaq Linemi angalatitsinermut pisortaq Jette Larsen oqarpoq, nangillunilu;- Taamaaliortariaqarneq aallaaveqarpoq, Januaarip aallaqqaataani servicekontrakti taamaatissammat, sulilu nalorninarmat qanorpiaq pisoqassanersoq. Inuit bilitsinik inniminneereersimasut, ukiortaallu kingorna angalasussat taamatut nalunaarfigisariaqarsimavagut.
Inuit bilitsinik inniminniisimasut katillugit 75-it missaanniittut nalunaarfigineqareersimapput, ukiortaap kingorna umiarsuarmik angalanissamik inniminniisimanerat atorunnaarallartoq, ukiortaallu kingorna angalaniarunik timmisartortariaqassasut. Arctic Umiaq Linemi angalatitsinermut pisortaq Jette Larsen aamma oqarpoq, inuit taakkua angalanissamik inniminniisimasut amerlanerit akissakinnerusuusut, akikinnermillu angalaniartuusut.
Arctic Umiaq Linemi angalatitsinermut pisortaq Jette Larsen aamma oqarpoq, Arctic Umiaq Linemi qanoq pisoqarumaarnera ukiamut paasinarsiumaartoq, taamanikkussamullu inuit juullip ukiortaallu akornanni angalanissamik inniminniisimagaluartut qanoq pineqarnissaat ersarinnerusumik oqaatigineqarsinnaalerumaartoq.
