"Ukiortaami pilluaritsi" filmi takutinneqaqqaalersoq

Isiginnaagassiami aaqqussuisup Otto Rosingip filmeq ima naatsumik oqaatigaa:

- Oqartarpugut asanninnilersaarutaasoq illarnartoq, pilikannertalik. Illarnartoq, asanninnilersaarut soorlu Olsenbandenikkutupajaaq ittoq kalaalerpaluttoq, Otto Rosing oqarpoq.

Filmi ilaatigut Nuummi ukiut pingasut matuma siorna pisimasumik aallaaveqarpoq.

- Nuummi qummortoortaaterpassuit ukiut pingasut matuma siorna tillinneqarput. Qatanngutiga Mikaali uani manuskriptiliortuusoq, sianerpoq oqarlunilu, aana oqaluttuatsialak, filmiliarissavarput.

Filmi kalaallisut qallunaatullu oqaluffiuvoq pingaarnertullu inuttaasoq kalaaliullunilu svenskiuvoq. Taassuma kalaalleqatiminit allaanerussuteqartup nunatsinnut tikinnera ilaatigut filmimi oqaluttuamut ilanngutsinneqarpoq.

- Isiginnaartitsisartoq svenskiullunilu kalaaliusoq, uumasuneersutalinnik nerisaqartuunngilaq, taamaattuunerminillu pingaartitseqaluni. Taannalu filmiliornitsinni atorparput. uumasuneersunik nerisaqartuungitsoq Kalaallit Nunaanut tikittoq, neqituumasunillu kalaallinik naapitsilluni. Taamaalilluta aamma inuttat namminneq isumassarsiaat filmiliornermi akuliuppagut.

Filmi Ukiutoqqami pilluaritsi unnugu katuami qulingiluanut takutinneqaqqaartussap takussutissiartaa uani ataani isiginnaarsinnaavat.