Ukiortaami oqalugiaat qallunaat politiikeriisa nersualaarpaat

Kuupik Kleistip ukiortaami oqalugiaataa pitsaasutut, oqimaaqatigiissutut killitsinnartutullu qallunaat politikeriinit nalilerneqarpoq.
januaarip 04-at 2011 14:36

- Oqalugiaammi maannakkorpiaq Kalaallit Nunaanni inuiaqatigiinni unammilligassat ajornartorsiutillu ajunngilluinnartumik sammineqarput ajornartorsiutaannaallu maluginiarneqarnatik. Tamatuma saniatigut aaqqiissutissatut periarfissanik pissutsillu ilaasa pitsanngoriartornerannik tikkuussisoqarpoq. Taama oqarpoq Venstret Kalaallit Nunaannut tunngasuni oqaaseqartartuat Flemming Møller.

Taassuma aamma oqalugiaammi imminut toquttoqartarneranik ajornartorsiutit kalluarneqarnerat killitsinnartutut oqaatigai. Tamannarpiarlu Socialdemokraatit Kalaallit Nunaannut tunngasuni oqaaseqartartuata Mogens Jensenip aamma maluginiarpaa.

- Naalakkersuisut siulittaasuata qulequttat kalaallinut pingaaruteqarluinnartut ilarpassui kalluarpai, ilaatigut silap pissusaa, uuliasiorneq aatsitassarsiornerlu, inuusuttunut ilinniagaqartitsinissamik sungiusarfissaqartitsinissamillu qulakkeerinninniarnermi unammilligassat, kiisalu Naalakkersuisut kommunillu akornanni suleqatigiinnissamik qulakkeerinninniarnermi unammilligassat. Inuusuttut taama amerlatigisut imminut toquttarnerannik ajornartorsiutit alianartullu ilaannik Naalakkersuisut siulittaasuata eqqartuinera soorunami aamma maluginiarpara. Isumaqarpunga tamanna pingaaruteqartuusoq, Socialdemokraatit Kalaallit Nunaannut tunngasuni oqaaseqartartuat, Mogens Jensen, oqarpoq.

Aamma SF-it nersualaarutaannarnik oqaaseqarput:

- Isumaga malillugu Kuupik Kleist ukiortaami oqalugiarluarpoq. Ilaqutariinnermut tunngasunik, inuiaqatigiinni neriuutinik kissaatinillu eqqartuinera immikkut maluginiarpara. Inuiaqatigiinni sanngiinnerpaartaasunik eqqarsaatiginninnera inunnullu ilungersunartorsiortunut neriuutissaqalersitsiniarnera isumaqarpunga inuttaanut ilisarnaataasoq, SF-it Kalaallit Nunaannut tunngasuni oqaaseqartartuat Kristen Touborg oqarpoq.

Allaammi Dansk Folkepartiimeersut isoriniagassaqanngillat:

- Aallaavittut isumaqarpunga oqalugiaat ajunngitsuusoq. Pingaarutillit arlallit tikippai toqqaannartumillu oqalulluni. Ajunngitsut erseqqissaatigai, kisiannili aamma ajornartorsiutit aaqqiivigineqartariaqartut eqqartorlugit. Taamaattumik oqalugiaat tunngavimmigut ajunngivippoq. Dansk Folkepartiip Kalaallit Nunaanut tunngasuni oqaaseqartartua Henrik Brodersen oqarpoq.