Ukiortaami oqalugiaammini namminersorneq pingaarnertut sammivaa

Naalakkersuisut siulittaasuata Hans Enoksenip ukiortaami oqalugiaataani namminersorneq pingaarnertut sammineqarpoq. <a href="http://knr.gl/index.php?id=4878" target="_self">Oqalugiaataa tamakkerlugu isiginnaaruk ></a>
januaarip 02-at 2009 07:29

- Nunaqqatikka, tamassi pilluaritsi aasamut inuiattut ullorsiornerput eqqorlugu Namminersorneq eqqunneqartussanngormat. Naalakkersuinikkut inuiaqatigiittullu aaqqissuussaanitsinni allannguineq tunngaviliisussaq nutaaq aallarnertussanngorparput, Hans Enoksen oqarpoq, oqaatigalugulu Namminersorneq taasissutigineqarmat qinersisartut 76 procentii akuersimmata, nuannaarnerup pianik qullilisimalluni.

Taassuma oqalugiaammini pingaartillugu taavaa, namminersulerneq iluatsissappat, ataatsimoorluni suleqatigiissutigineqartariaqartoq.

- Tamatta ataasiakkaarluta periarfissanik ineriartuutaasussanik ujartuinerusariaqalerpugut, ikiorneqarnissaannaq utaqqinagu. Timikkut tarnikkullu nukittuujusariaqarpugut, tamannalu angusinnaavarput immitsinnut piumaffigeqatigiinnitsigut ikorfartoqatigiinnitsigullu.

Aap, annernartarumaarpoq suulluunniimmi akeqanngitsumillusooq taamaattussaannartut anguneq ajorpavut. Aamma namminersorneq taamaappoq – ilungersorluta sulinitsigut iluatsissaqqaarparput, Hans Enoksen oqarpoq, ilaatigullu tikkuarlugu namminersornerup iluatsinnissaanut ilinniartitaaneq aqqutissaasoq.

Namminersulernermi naalagaaffimmit siullugit tiguneqartariaqartutut taavai aatsitassanut tunngatillugu akisussaaffik, inuussutissalerinermut tunngatillugu inatsiseqarneq kiisalu avataaniit sulisussarsiortarnermut tunngasut.

Aalisarnermik inuussutissarsiuteqarnerup aaqqissuuteqqinneqarnissaa, kommunit nutaat, isumaginninnikkut politikki Københavnimilu silap pissusaa pillugu ataatsimeersuarnissaq Naalakkersuisut siulittaasuata aamma oqalugiaammini tikippai.