Assi: DR

Ukiortaami oqalugiaammi Kalaallit Nunaat eqqaaneqanngilaq

Danskit ministeriunerat ukiortaami oqalugiarami, naalagaaffeqatiginneq Kalaallit Nunaat Savalimmiut issittorluunniit eqqaanngilai.

Lars Løkke Rasmussen Christiansborgimi ministeriunerup allaffeqarfiani akunnerit sisamat matuma siorna ukiortaami oqalugiarpoq.

Siunissamut eqqarsarnissamik ukiortaami oqalugiaataa annerusumik oqariartuuteqarpoq qanga pereersut pineqaratik aamma politikkikkut erseqqissakkanik oqariartuutinik imaqarpiarani.

Ministeriunerullu ukiortaami oqalugiaataani minitaqarpoq, tassalu Naalagaaffeqatigiinneq Kalaallit Nunaat aamma Savalimmiut Lars Løkke Rasmussenip oqalugiaataani eqqaaneqanngillat.

Taamaakkaluartoq Danmarkip nunasiaatigisimasai ministeriunerup oqalugiarami eqqaavai.

Qeqertat amerika avannarliup kujalliullu akornanniittut De Vestindiske Øer, Danmarkip oqaluttuarisaanerani kannguttaatsuliorfigineqarsimasutut taavai, qeqertani taakkunani innuttaasut inussiatut atorneqarnerisigut Danmarkimit iluanaarutigineqarmata qeqertat taakua amerikamut ukiut 100-it matuma siornatigut tunineqarnissaat sioqqullugit.

Naalakkersuisut siulittaasuat Kim Kielsen ukiortaami oqalugiassaaq. Tamannalu pissaaq sapaammi ukiortaami unnukkut arfineq pingasunut. Naalakkersuisut siulittaasuata oqalugiarnera toqqaannartumik KNR TV-ikkut isiginnaarneqarsinnaavoq aamma KNR radiomi tusarnaarneqarsinnaalluni.

Nutartigaq 10.49: Statsministerip ukiuni qulini kingullerni ukiortaami oqalugiaatai misissuataaraanni, nunarput naalagaaffeqatigiinnerluunniit eqqaaneqarsimanngilaq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl