Ukiortaami ilassinninnermi Nersornaammik tunniussisoqarpoq
Inatsisartut siulittaasuat Lars-Emil Johansen ilassinnittoqarnera iluatsillugu Namminersorlutik Oqartussani atorfilittatut ukiorpassuarni sulisimasoq Peter Beck Nersornaammik sølvimik tunivaa. Nersornaaserneqartoq najuuttunit ersaartaanneqarluni inuuissiornerani erinarsorfigineqarpoq.
Issittup soqutigineqaraluttuinnarnera takkussimasut akornanni malunnarpoq, nunammi kangianiittut Københavnimi aallartitaat arlallit aamma takkussimammata.
Naalakkersuisut siulittaasuata oqalugiarnermini ukiumi qaangiuttumi pisimasut eqqartorpai - ilaatigut uranimut akuersaanngilluinnarnerup atorunnaarsinneqarnera aammalu suliniutit angisuut pillugit inatsimmut allaannguutissat akuersissutigineqarnerat. Aammattaaq ukiumi nutaami ilinniartitaanerup annertunerusumik sammineqarnissaa, aalisarnerup iluani iluarsartuusseqqinnissaq, nunalerinerup nutarsarneqarnissaa aamma aatsitassarsiornerup iluani inerisaanissaq eqqaavai. Washingtonimi Kalaallit Nunaata aallartitaqarfissaa aamma immikkut eqqaavaa.
- Naalakkersuisut angusaqarluarniartuupput. Aalajangiinerit, immaqa nuannarineqarpallaanngitsut, ingerlattariaqarpagut, oqarpoq.
Ilassinninneq pisarnertut marloqiusanngorlugu ingerlanneqarpoq. Naalakkersuisutigoortoq, politikerit atorfilittat qullersat aammalu ilisimatusartut siulliunneqarlutik, taavalu suleqatigisat tullinnguunneqarlutik. Aliikkusersuisut tassaapput erinarsortartut arnat Aviaja Lumholt, Karina Møller aamma Nukaka Coster-Waldau.
