Ukioq qaangiuttoq: Kalaallit nunarsuarmioqataanerulersimapput
Aksel Jeremiassen isumaqarpoq, inuiaqatigiit nunarsuarmioqataasutut imminnut isiginerulersimasut. Tamatumunnga pissutsit marluk takussutissaasut tikkuaavoq.
Inuiaqatigiit kalaaliussusermik paasinninnerat allanngorpoq. Aammalu Naalakkersuisut suliffeqarfinni inuiaqatigiit pigisaanni siulersuisussanik qinersisarnerani.
Inuit kalaaliussusermik isiginnittarnerisa allanngornera ima oqaatigai:
- Kalaallit siullermik tassaapput kalaallisut oqalussinnaallutillu Kalaallillu Nunaanni inunngorsimasut, aammalu angajoqqaavisa arlaat Nunatsinni pinngitsoorani inunngorsimasoq. Kisianni tamanna allamut massakkut sangujartuaarpoq. Kinaluunniit Nunatsinni inooqataarusullunilu sulerusuttoq tikilluaqquneqarpoq. Taavalu nammineq pisinnaasani naapertorlugit inuiaqatigiinnut akuliuttarpoq, Aksel Jeremiassen oqarpoq.
Tassalu Aksel Jeremiassen naliliivoq, inuiaqatigiit matoqqajunnaarlutik inuiaqatigiinnut allanut ammanerulerlutik, nunarsuarmioqataasutut pissuseqarnerulersimasut. Kalaallini inooqataasut qanoq oqaluttuunerat sumilu inunngorsimanerat apeqqutaajunnaarluni.
Nunarsuarmioqataasutut pissusilersuleriartornitsinnut takussutissatut allatut Aksel Jeremiassenip tikkuagaa tassaavoq suliffeqarfinni inuiaqatigiit pigisaanni siulersuisuni issiasussanik qinersisarneq:
- Suliffeqarfinni Nunatta pigisaanni naalakkersuisunut inatsisartunulluunniit ilaasortaasimasunik siulersuisulerneqartarnerat siornatigut nalinginnaasuuvoq, soorlu Royal Greenlandimi, Tele Greenlandimi taakkualu assigisaanni. Najoqqutarisalli qanga atuussimagaluartut allanngortikkiartuaarneqarput, sumut imaluunniit kikkunnulluunniit ilaasortaasimaneq apeqqutaajunnaariartorluni. Maanna ilinniagaqarsimassuseq misilittagaqarnerlu apeqqutaaleriartuinnarput, iliniagartooq Aksel Jeremiassen naliliivoq.