Ukioq naatinnagu Nunatta nakorsaanera ukiumoortumik nalunaarusiussaaq

Nunatsinni nakorsaaneq ukiumoortumik nalunaarusiornissaminut ukiut tamaasa periarfissaqarneq ajorpoq, taamaammat maani Nunatsinni peqqissuserput qanoq innersoq ukiut tamaasa paasisinnaasanngilarput. Soorlu 2010-mi ukiumoortumik nalunaarummik saqqummertoqanngilaq, tamannalu Palle Christiansenimit, Demokraatineersumit, ernummatigineqarpoq.
Allattoq Carla Davidsen
septembarip 10-at 2013 08:20

Politikeri taanna, nammineq kigutilerisuusoq, paragraf 37 naapertorlugu apeqquteqaamminut, Peqqissutsimut Ataqatigiinnermullu Naalakkersuisumit, Steen Lyngemit, maanna akineqarpoq.

Steen Lyngep nassuiarpaa, Nunatsinni nakorsaanerup ulapinnini pissutigalugu ukiumoortumik nalunaarusiornissani salliutissimanngikkaa, ukiunulli arlalinnut nalunaarusiornissaq qinertariaqarsimagaa - soorlu 2007-imiit 2010-mut nalunaarusiaq eqqarsaatigalugu.

Demokraatit ermummateqarnerat Steen Lyngep paasisinnaanerarpaa, Nunatsinnimi innuttaasut peqqissusaat ukiumoortumik nalunaarusiani sukumiisumik takuneqarsinnaasarmat. Nkorsaaneeq suliassaqarneruleraluartoq, 2011-mit 2012-imillu ukiumoortumik nalunaarusiap internetikkut ukioq naatinnagu atuarneqarsinnaalernissaa Steen Lyngep neriorsuutigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq