Ukioq naallugu timmisartuussisalerniarpoq
Ukioq kaajallallugu timmisartuussisarnissaq septembarip ulluisa qulingiluaanniit ingerlanneqalissaaq, Air Icelandilu Nuummiit unnungaatsiartukkut aallartassaaq, Reykjavikimullu unnuakkut apuuttassalluni sermitsiaq.ag-ip nittartagaani tamanna allaaserinnittoqarpoq. Ilaasullu Danmarkimut ingerlaqqinniarunik busserlutik Keflavikiliarsinnaapput, aqaguani ullaakkut tamaanngaanniit Kastrupimut ingerlaqqissinnaallutik.
Nuummiit Island aqqusaarlugu timmisartuunneqarusuttut amerliartornerat pissutigalugu Air Icelandip timmisartuussisarnini annertusivai. Taamaattumillu nunanut tamalaanut timmisartuussisartoq, Icelandair, suleqatigineqalerpoq.
Aamma nioqqutissanik nutaanik, pingaartumik naatitanik, pisiniarfiit piumasaqaleraluttuinnarnerat, timmisartuussinerup sivitsorneqarneranut pissutaaqataasoq, Air Icelandimi tuniniaanermut ussassaarinermullu pisortaq, Ingi Thor Gudmundsson, oqarpoq:
- Icelandair Cargo Hollandimiit Spaniamiillu naatitanik nutaanik Islandimut ullut tamaasa timmisartuussisarpoq, Islandilu aqqusaarlugu Nuummut nioqqutissanik assartuisitsineq akilersinnaavoq. Islandimiut immummik nioqqutissiaat Nuummi aamma soqutigineqarput. Taamaattumik assartukkanut aamma inissaqartitsivugut, Ingi Thór Gudmundsson sermitsiaq.ag-mut oqarpoq.
