Ukioq naallugu Canadamut aqqut
Ukioq naallugu Canadamut timmisartumik angallassisalernissamut, Icelandair aapaagumiit pilersaaruteqarpoq, taama Sikunews.com allappoq.
- Aappaagu apriilip qaammataa aallarnerfigalugu Canadamut aqqut ammarneqassasoq pilersaarutaavoq, Gunnar Mar Sigurfinnsson, Icelandair-imi tuniniaanermut pisortaq, nutaarsiassaqartitsivimmut The Chronocle Herald-imut taama oqarpoq.
Islandip Canadallu akornanni timmisartuussisarnermut aqqutit, killeqartorujussuusimagaluarput, maannali tassa isumaqatigiissuteqarput, ukioq naallugu timmisartumik aqqutinik pilersitsisoqassasoq.
Naliginnaasumik Icelandair, sapaatip akunneranut pingasoriarluni Keflavikimiit Halifax-imut timmisartuussisarpoq, ukiorli naallugu taamatut timmisartuussineq pisarnani. Maannali tassa aalajangerneqarpoq, ukioq kaajallallugu Islandimiit Canadamut timmisartuussisoqartalissasoq.
