Ukioq kalaallit timersortartut rekordiliiffigisaat
GIF ukiormanna nalliuttorsiorpoq. Kalaallit Nunaanni timersoqatigiiffiit kattuffiattut ukiunik 60-nngortorsiorpoq, tamannalu nalliuttorsiutigineqassaaq. Pisortatigoortumik nalliussineqarnissaa Nuummi septembarip 27-ianit 29-ianut ingerlanneqassaaq, ilaatigullu nunanit tamalaanit tikeraartoqassalluni. Nunatsinni sumiiffinni assigiinngitsuni nalliuttorsiorneq aamma malunnartinniarneqassaaq. Nunarput tamakkerlugu 2013-imi timersornikkut annertuumik pisoqarfiussaaq.
-Kalaallit Nunaanni Timersoqatigiit Kattuffiat ukiuni 60-ini piusimanermini timersornikkut pingaarutilimmik inissisimasimavoq. Timersoqatigiit Kattuffiannit ukiuni ineriartorfiusuni kattuffiit ilaasortani sullittalersimavai aaqqissuussivigalugit peqatigiiffilerinikkullu. Timersoqatigiit Kattuffiat annertunerujartuinnartumittaaq timersornermi politikikkut oqallinnerit sunniuteqaqataaffigilersimavai. GIF-imit kissaatigaarput inuiaqatigiinnut suliatigut akuunerput nukittorsassallugu kissaatigiuarparput, tassungalu attuumasumik GIF-imit Peqqissutsimut Naalakkersuisoqarfillu inuiaqatigiit peqqinnerulernissaannik sulinerup nukittorsarnissaa pillugu isumaqatigiissuteqarpugut. Siulersuisunit piffissami aggersumi Kalaallit Nunaanni ukiuni tulliuttuni timersorneq pillugu takorluukkat pillugit suliavut ingerlateqqissavavut, GIF-ip siulittaasua Nuka Kleemannm, kattuffiup ukiortaami oqaaseqaataani oqaluttuarpoq.
Ukiormanna aamma Arctic Winter Gamesimut, Nuummi 2016-imi ingerlanneqartussamut, piareersaatit aallartisarneqassapput. Nammineq kajumissutsiminnik ikiuuttussat 1000-init amerlanerusut, aaqqissuussinerup taama angitigisup aarlerinanngitsumik ingerlanneqarnissaanut pisariaqartinneqartut, pissarsiarineqarnissaat maannangaaq sulissutigineqalereerpoq. Timersornerup tungaatigut 2013-imi nunarput Island Gamesimut peqataatitaqassaaq. Unammiuaarnerit taakku Bermudami ukiormanna ingerlanneqassapput, peqataasussallu pissutsini kiannerusuni allaanerungaatsiartunilu misigisaqalaavissallutik naatsorsuutigissavaat.
