Ukioq arsaaffiusoq takinerpaaq
Silaannaap allanngoriartornera meeqqat inuusuttullu arsaakkumatuut Qaqortumeersut qungujulaarutigaat. Nuannaarnerannullu pissutaavoq ukioq arsaaffiusoq aatsaat taama takitigimmat qaammatini qulini aputeqanngitsumi arsaattoqarluni.
- Ilaatigut tamanna pissutigalugu meeqqat inuusuttullu 200-ut missaanniittut sapaatip akunneranut arsaaffimmiittarput, taama KNRimut unnersiorpoq ivigaaraasanik arsaattarfiup siulersuisuini siulittaasoq Kent Kielsen.
Danmarkimi arsaaffiit qaammatini qulingiluani aputeqanngitsumi atorneqarsinnaasimapput. Taamaattunik Qaqortumi arsaaffik qaammammik ataatsimik sivisunerusumik aputeqarsimanngilaq Danmarkimut sanilliutissaganni.
Qaqortumi arsaaffik ivigaaraasalik septemberip 13-iat FIFAp præsidentiata Sepp Blatterip pisortatigoortumik atoqqaartippaa. Arsaaffilli taanna atorluarneqaqisoq 2009-mi atorneqalerpoq.
- Arsaaffimmi periarfissat annertusarniarlugit siulersuisut aningaasanik katersuiniarsimapput. Pilersaarutigaarput arsaaffiup saniani pinnguartarfiliornissaq nukittorsartarfeqarsinnaasumik. Nuannaarutigeqaarpullu Lokal anlægsfonden-imit 150.000 krone-nik tapiiffigineqaratta, taama Kent Kielsen oqarpoq.
