Ukioq 2010 naggueqatigiit Inuit Canadami ukiorissavaat

Naggueqatigiit Inuit Canadallu issittortaa ukioq manna oqallisaaqalutillu pingaartinneqartorujussuupput, aappaagulu qitiutinneqassallutik.

Nalliuttorsiornerit eqqumiitsulianik katersugaasivimmi Ottawamiittumi januaarip qiteqqunnerani aallarnerneqassapput, ukiorlu naallugu nalliuttorsiutigineqassasut.

Nerersuaqatigiittoqassaaq aliikkusersuisoqassallunilu, soorlu aamma naggueqatigiit Inuit kulturikkut immikkuullarissusaat ukiuunerani Vancouverimi februaarimi OL-ertoqarnerani nittarsaanneqassasoq.

Vancouverimi OL-i ammaanersiorneqalerpat naggueqatigiit Inuit peqataassapput, OL-ilu naammassippat aamma takutitsisoqassalluni.

Sanalukkat assigisaallu tuniniarneqassapput, OL-ertoqarneranullu atatillugu avammut nittarsaassisoqarumaarluni.

Canadap issittortaani inooriaaseq takutinniarneqassaaq, silallu pissusaata allanngoriartornerata sunniuteqaatai aamma saqqummiunneqassallutik.