Ukioq 2009 ukiut kiannerpaaffiisa tallimassaraat
Nunarsuarmi silasiornermik ingerlatsiviup WMO-p nalunaarutigineqarallartut tunngavigalugit, Københavnimi Bella Centerimi tusagassiortunik katersortitsinerani tamanna ilisimatitsissutigineqarpoq.
- Kianneruleraluttuinnarsinnaanerata nalaaniittugut qularutissaanngilaq. Taamaattorli kiannera assigiimmik siaruarsimanngilaq. Sumiiffiit ilaanni ukiuunera suli issittassaqaaq, imavissuilli qulaanni avannarpasinnerusumilu kiannerulissaaq, WMO-p pisortaa Michel Jarraud oqarpoq.
Silap agguaqatigiissillugu kiannerulernera ukiormanna nunavissuarni malunnarpoq.
Taamaallaat USA-mi Canadamilu nalinginnaasumit nillerneruvoq. Taamaattorli 2009 Aasiap kujasinnerusuani Afrikallu qiterpasinnerusortaani ukiuni kinguillerni aatsaat taama kiatsigaaq.