Ukioq 2008 naggueqatitta iluarusuutigisaannik pisoqarfiuvoq

Nunavimmi nunamik piginnittussaanermut atatillugu isumaqatigiinniarnerit ukiorpaalunni ingerlanneqareerlutik naammassineqarput. Nunatsiavut kiisalu Nunavik namminersornerulersutut oqaatigineqarsinnaaapput, Nunatsiavut novembarimi immikkut naalakkersuisoqalerluni.
Allattoq Louise M. Kleemann
decembarip 29-at 2008 09:31

Inuit Tapiriit Kanatami præsidentiata, Mary Simonip ungasinngitsukkut oqalugiarnermini oqarneratuut; naggueqatigiit Inuit, Alaskamiit Canada aqqusaarlugu, Atlantikup tungaanut, maanna nunaminnik piginnittutut taaneqarsinnaalermata, maanna tamanna tamarmi taaneqarsinnaalerpoq; Inuit Nunaat.

Akilinermi naggueqatigiit Inuit atuarfinni najugaqarfiutigisuni 1950-ikkunniit -70-ikkut tungaannut ajortumik pineqartarsimanerat pillugu Canadami ministeriunerup, Stephen Harperip partiillu illuatungiliuttut siuttuisa, pingaartorsiorlutik pisortatigut utoqqatsernerat ukiup ingerlanerani pisutut puigunaatsutut taaneqarsinnaavoq.

Taamanilu ministeriunerup naggueqatigiit Inuit Canadamilu naalakkersuisut qaninnerusumik suleqatigiinnissaannik kissaataa timitalerneqarporlusooq Leona Aglukkaq, Nunavumeersoq, Canadami peqqinnissamut naalakkersuisunngortinneqarmat. Ukiorlu manna aamma Nunavumi naalakkersuisut arnamik siulittaasortaarput, tassalu Eva Aariak Nunavumeersoq, taamaalilluni Akilinermi naalakkersuinermik sulialinnut nuimanernut ilaalerpoq.

Mary Simonip oqarneratuut: naggueqatigiit Inuit inuusuttaasa maanna takusinnaalerpaat allanit nikanarnerunatik sunneeqataasinnaallutik.

Tamakkua tamarmik Canadami naggueqatigiit Inuit siunissaannut neriulluarnartoqalersitsipput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq