Muté B. Egede: Ukiartinnagu nutaamik naalakkersuisoqalissanngilaq

Naalakkersuisut siulittaasuata akisussaaffiit sinneruttut Naalakkersuisut akornanni agguaakkallarniarpai.
Muté B. Egede Peter Olsenip tunuarnerata kingorna Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfiit nammineerluni tigummigallarpai. Taassuma taakku Naalakkersuisut akornanni ataasinngorpat agguaanniarpai. Assi © : Carsten Faurschou/KNR
juunip 03-at 2023 10:40

Peter Olsen Inuit Ataqatigiinneersoq Ilinniartitaanermut, Kultureqarnermut Timersornermut Ilageeqarnermullu Naalakkersuisutut marlunngormat tunuarpoq.

Naalakkersuisunili ukiaru ataatsimiittoqalertinnagu nutaamik naalakkersuisoqalissanngilaq.

Naalakkersuisut siulittaasuat, Múte B. Egede KNR-imut oqarpoq.

- Ukiaru inuttaligassaq ataaseq inuttalerneqarumaarpoq. Qanorlu isikkulimmik aaqqiiniarnera ataasinngorpat oqaluttuarissavara, taanna oqarpoq.

Ilinniartitaanermut, Kultureqarnermut, Timersornermut Ilageeqarnermullu naalakkersuisoqarfiit Naalakkersuisuni ilaasortat sinnerinut qanoq agguaanneqarnissaat Múte B. Egedep paasissutissiissutigerusunngilaa.

Tassanngaannartumik tunuartoq

Inatsisartuni sakkortuumik oqallittoqareernerata kingorna Peter Olsen unillatsiarnermi tassanngaannartumik tunuarpoq.

Taamaalillunilu naalakkersuisoqarfik nunatta karsianit 15 procentit sinnerlugit aningaasartuuteqarfik qimappaa.

PETER OLSENIP TUNUARNERA PILLUGU SULIAQ

Peter Olsen Inatsisartuni oqallittoqangaatsiareernerata kingorna unikkallarnermi tassanngaannartumik tunuarpoq.

Peter Olsenip KNR-imi kalaallisut oqaasilinnik tusagassiortussaaleqinermut tunngatillugu suliami iliuuseqarnerata amigarnera pissutigalugu Demokraatineersup Nivi Olsenip tatiginnikkunnaarnermik taasinissaq ataatsimiinnissaq sioqqullugu siunnersuutigaa.

Isornartorsiuinermi pingaartumik Peter Olsenip 2022-mi juunimi Fagbladet Journalistenikkut suleqatigiissitamik KNR-ip siunissaanik misissuissamik pilersitsinissani neriorsuutigaa.

Suleqatigiissitarli neriorsuutaasoq piviusunngunngilaq.

Tatiginnikkunnaarnermik taasisoqannginnerani Peter Olsen nammineerluni siornartorsiuinermut kinguneqartitsilluni tunuarniuteqarpoq.

Múte B. Egedelli Peter Olsenip qimagai ukiakkut ataatsimiinnissap septembarip 22-ani aallartittussap tungaanut Naalakkersuisut akornanni agguaateqqaannarnissaat pitsanerpaatippaa.

- Pingaartissimavara soorunami suliassat ingerlanissaat. Aamma uannut kissaat annerpaaq soorunami tassaagaluarpoq, aamma massakkut suliaqarnermi nikerartitsivallaarani ingerlasoqarnissaa, taamaattorli aamma pisut aallaavigalugit sulinermilu pisussaaffeqarpunga akisussaaffiit taamatut suliarissallugit, Muté B. Egede oqarpoq.

Aasap kingorna

Peter Olsenip tunuarnera upernaakkut ataatsiminnerup ulluini kingullerni pivoq. Naalakkersuisoq nutaaq Inatsisartunit akuerineqaqqaartussaavoq.

Múte B. Egedep Naalakkersuisut siulittaasuatut Inatsisartut taasinissamut aggersarsinnaavai, periarfissarli taanna atorusunngilaa.

- Massakkut inatsisartut ataatsimiinnerata naaliffaarinnerani una pisoq pivoq. Taamaammallu aamma unammilligassaqarfiuvoq. Sineriammilu aamma angerlarsimaffeqarrapput, Inatsisartuni ilaasortat, imaaliinnavilluni taamaaliornissaq pinagu, pipallatamik sulineq ingerlannagu, aaqqiissutissaq pitsaasoq, pitsaanerpaatut isigisara aallaavigalugu alloriassaagut. Taavalu tassanngaanniit aamma inuttaliineq nutaaq ukiaru piumaarpoq, Muté B. Egede oqarpoq.

Muté B. Egedep naalakkersuisoqarfiit agguataarnerat ataasinngorpat ullaap tungaani saqqummiutissavai.