Silarput aapriilimiilli pisarnermit kianneruvoq.Assi: KNR

Ukiaraluartoq: Kujataani suli naasorsunnitsoq

Nunatta kujasinnerusortaani ukiup taamaalinerani naasut sikkerarlutillu suli tipigimmata alutorsaatigineqarput.

Nunatsinni sila aapriililli qaammataanit pisarnermit kianneruvoq. Tamannalu Kujataani oktobari naajartuleraluartoq suli malugineqarsinnaavoq.

- Tassa suli issorsunnippoq - naasorsunnilaarpoq suli, Qaqortormiu Elias Hansen naasoq naajutigalugu taama oqaluttuarpoq.

Tamaanimi naasut suli sikkerarlutillu tipigimmata alutorsaatigineqarput. Kisianni aamma ukiut siuliini taamaattarsimanngimmata tupigusuutigineqarput.

- Tupigusoqaanga uanga aamma. Siorna suna tamarmi naanerlukkami paarnaqarnani. Ukioq manna allaanngivippoq siorna pissaagaluani tamaasa tunniussuukkai, siger en forundret Sofie Tittussen.

AAMMA ATUARUK Nalinginnaasumit kianneruvoq

Taannali kisimi alutorsaatiginninngilaq. Valmuemmi suli aamma Qaqortumi sikkertarput.

- Alutornaqaat taakkua. Valmueqarnermut alutornaqaaq. Ukiaq taama suniarnerpoq? Elias Hansen oqarpoq.

DMI-imi silasiortut nunatsinni pissutsit malinnaavigaat. Nunatsinnimi aapriilimiilli sila pisarnermit kianneruvoq.

- Ilumoorpoq sila pisarnermit aapriilimiit kiannerusimammat. Tamannalu aasaq ukiarlu ilanngullugu atuuppoq. Maannamullumi. Aamma oktobarip qaammataa pisarnermit kianneruvoq. Ingasammik Kalaallit Nunaata avannaani, John Cappelin, DMI-mi silasiortoq, taama oqarpoq, nangillunilu:

AAMMA ATUARUK Ukioq manna apriilimi aatsaat taama kiatsigaaq

- Sila allanngorartartuuvoq, ukiumiit ukiumut, ukiup qanoq ilineranit qanoq ilineranut. Tamanna silap pissusiata nikerarneranik pissuteqartarpoq. Maannakkulli taamaannera silap pissusiata allanngoriartornerata kingunerisaanik pissuteqarnera assortorneqarsinnaanngilaq.

Kisianni Kujataani silap neruminnera qanoq sivisutigissava? Innuttaasut tamatuminnga eqqoriaatippagut.

- Ila ukiumit ukiumut silarput allanngorarnermik. Aatsaat uanga taamaatillugu misigaara, Sofie Tittussen oqarpoq.

Elias Hansenili nalorninnginneruvoq.

- Immaqa novembarip qeqqat tikillugu taamaasapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat