Ukiamut ulapaartussanngorput
Inatsisit nutaat, inatsisinillu allannguinerit arfineq-marluk Naalakkersuisunik saqqummiunneqarput. Tassalu Inatsisartut upernaakkut ataatsimiinneranni naammassineqartut.
Upernaakkut ataatsimiinnermi naammassineqartut ilagaat nunatsinni suliffeqarfiutillit nunanilu allani suliffeqarfiit naligiimmik unammillersinnaassagaat qillerinermi pilersuinissami neqeroorutinik saqqummiussisarnerni. Kiisalu oqartussat oqartussanut akiligassaqartunut akiitsunik ajornannginnerusumik akiliisitsisalernissaq.
Upernaakkut ataatsimiinnermi pingaarnersiuisariaqarnerup inatsisartut naalakkersuisunut ilaatigut peqqussutigaat imeruersaatit eqeersaatitallit meqqaanut inuusuttuaqqanullu inerteqqutigineqalissasut, kiisalu ivikkanik arsaattarfinnut pingasunut pilersaarusiornermut aningaasanik immikkoortitsisoqassasoq, atuarfitsialaallu killiffiani nalilersuisoqassasoq.
Upernaakkut ataatsimiinnermi pisinniarfinni nittartakkanilu atuisut pisinnaatitaaffiinik inatsisartunit pitsanngorsaasoqarpoq. tassalu ilaatigut maalaaruteqarniarnermi piffissarititaq ukioq ataasiinnaassimagaluartoq ukiunut marlunnut sivitsorneqarmat.
Tamatumanilu akileeqqusissut 100 krone ataallugu akeqassasoq aaliangiisoqarpoq.
Suliassalli arlallit Inatsisartut ukiaanerani ataatsimiinnissaanut kinguartsinneqarput.
tassalu siunnersuutit 15-nit ikinnerunngitsut, assigiinngitsunut tunngassuteqartut
ukiaanerani ataatsimiinnissami oqaluuserineqartussanngorput.
Tamannalu ataatsimiititaliap piffissamik sivisunerusumik piumasaqarsimaneranik, kiisalu Inatsisartut ataatsimiittarfiata oqoqalersimaneranik tunngaveqartumik oqaluuserisassat arlallit kinguartinneqarsimapput.
Taamaakkaluartorli aalisarnermut inatsisissaq nutaaq upernakkut ataatsimiinnermi oqaluuserineqarpoq, ukiaaneranilu ataatsimiinnissami aappassaaneerneqartussanngorluni.
