Ukaliusap atuarfiata annersaa matoqqagallarpoq

Nuummi Ukaliusap atuarfiata ikuallannerata kingorna atuartut 1. klassemiit 9. klassemut marlunngorneq pingasunngornerlu atuanngikkallarput. Ikuallanneq aseruisimaqaaq.
Allattoq Noah Mølgaard
apriilip 26-at 2011 06:39

Ukaliusap atuarfiani 1. klassemiit 9. klassemut atuartut angajoqqaavilu kalerrinneqareerput marlunngorneq pingasunngornerlu atuassanngikkallartut. Atuarfimmi pisortaasut isumaqarput illersorneqarsinnaanngitsoq ikuallassunneqisumi atuartitsinissaq.

- Ikuallannerup kingorna suli tipersuaq atavoq iikkallu paaginnanngorsimallutik, Ukaliusami atuarfiup pisortaaq Karno Lynge KNRimut taama oqaluttuarpoq.

Taamattorli 10. klasset atuartinneqarnerat pilersaarutaasutut marlunngornermi ingerlanneqarpoq atuarfiup illutaani ikuallannermit eqqorneqarsimanngitsuni. Aamma soraarummeerluni misilitsinnerit pilersaarutaasutut pingasunngornermi aallartissapput. Atuartulli sinnerinut atuartitsinerup pilersaarusiornera maanna Kommuneqarfik Sermersuumi atuarfeqarfimmi pisortaasut suleqatigalugit pilersaarusiorneqarpoq.

- Sulisut eqqiaasut arfininngormalli suliartortinneqarput asaanerlu tamaviaarluni ingerlanneqarsimavoq. Kisianni suli suliassaaqaaq oqareernittut atuarfiup illutaa ikuallannermit eqqorneqarsimasoq suli tipeqimmat, Karno Lynge oqarpoq.

- Ikuallanneq pissutigalugu kissarneq annertooq pilersimannguatsiarpoq. Anartarfiit errorfiillu sungaarujuttuinnaapput, Karno Lynge oqarpoq.

Atuartitsinerit sisamanngornermiit qanoq ingerlanneqassanersut Kommuneqarfik Sermersuumi atuarfimmi aqutsisut suleqatigalugit pilersaarusiorneqaleruttorpoq.