Ukaleq Slettemark inuusuttut ujakkaarlutik ooqattaasartut Slovakiami siorna nunarsuarmi pissartanngorniunneranni pissartanngorpoq. Ukiorli manna napparsimanini peqqutigalugu peqataanngitsoorluni.Assi: Privat

Ukaleq Slettemark: Timiga nukissaalatsimmat sungiusarsinnaanngilanga

Ukaleq Slettemark napparsimanini pissutigalugu nunarsuarmi pissartanngorniuteqataanngitsoorpoq. Napparsimanera sumik pissuteqarnersoq nakorsanit suli paasineqanngilaq.

18-inik ukiulik, Ukaleq Slettemark, inuusuttut ujakkaarlutik ooqattaasartut nunarsuarmi pissartanngorniunnerannit januaarimi angerlarpoq. Tamatumuunali ujaminnanngitsoorpoq. Taannami nunarsuarmimi siorna pissartanngortoq Schweizimi inuusuttut ujakkaarlutik ooqattaasartut ukioq manna pissartanngorniunneranni peqataananiluunniit angerlaannartariaqarsimavoq.

Ukaleq Slettemark nunarsuarmi pissartanngorniunnerit aallartinnissaannut qaammat ataaseq sioqqullugu napparpoq, Schweizimiinninilu tamaat napparsimalluni. Sulilu aaqqinngitsoq, KNR-imut oqaluttuarpoq.

- Inuusuttut nunarsuarmi pissartanngorniunneranni peqataanngitsoornera artornarpoq. Ukioq mannami anguniakkama annersaraat. Timersuummilli aallussisutut inuuneq taamaappoq. Napparsimakulanartarpoq, Ukaleq Slettemark Norgemi angerlarsimaffimminit oqaluttuarpoq.

Nunatsinni inuusuttunut maligassiuisoq

- Aseruunneqalersimagunarama. Nakorsiarnikuuvunga, aaverseqattaarpungalu - sunali ajoqutiginerlugu suli paasinngilara. Arriikkaluamik aaqqikkiartorpunga. VM-eriarlunga aallarama inuummarlulaarpunga, qaangiunnissaali neriuutigisimagaluarpara. Aaqqinngilangali. Aaqqinniassagamalu maanna eqqissisimaarpunga.

AAMMA ATUARUK Ukaleq Slettemark napparsimanini pissutigalugu inuusuttuni pissartanngorniuteqataanngitsoq

Ukaleq Slettemark inuusuttut ujakkaarlutik ooqattaasartut Slovakiami siorna nunarsuarmi pissartanngorniunneranni pissartanngorpoq. Tamatuma kingorna unamminerpaalunni angusarissaaqattaarpoq, Kommuneqarfik Sermersuumilu borgmesterimit, Charlotte Ludvigsenimit, "Inuusuttunut maligassiuisoq"-mik aggustimi nersornaaserneqarluni.

Maannamut sapaatit akunnerini arfinilinni napparsimavoq. Sapinngisamik atuartarpoq, piffissalli annerpaartaani angerlarsimaannartariaqartarluni - sungiusarsinnaanngilarmi timaalu nukissaalatsilluni.

Nakorsanit paasisaqarnissani utaqqimaaraa

- Nuffaseqqaarpunga. Kingorna toqqusaarlulerlungalu kakkilertalerpunga, sapaatillu akunnerata ingerlanerani inuummarlunneruleriartuinnarlunga. Niaqorlulerpunga nererusussuseerullunga. Kingornali pitsanngoriartorpunga. Sungiusariaraluarpunga, ajorseriaannaqqillungali. Pingajussaanik taamaalivunga.

- Nuannertuinnaq misinnarpoq. Taamaannerali sivitsorpoq. Timiga nukissaalatsivoq. Sungiusaqqeriartaraluarpunga, ajorteriaannartarlungali, Ukaleq Slettemark oqarpoq .

AAMMA ATUARUK Ukaleq Slettemark får OL-legat: - Det er en stor anerkendelse  

Ukaleq Slettemarkip nakorsanit paasisaqarnissani pissanngalluni utaqqimaarpaa.

Inuttaa Norgemi ilinniarnertuunngorniarfigisamini najugaqarlunilu sungiusartarpoq.

Marsimi peqataasinnaanissi neriuutigigaa

Timersullammattut Kommuneqarfik Sermersuumit januaarimi toqqagaavoq, Dansk Idrætsforbundimiillu siorna decembarip qaammataani OL-imut legatinnalluni. OL-legat timersuummik aallunneqarpiartanngitsutut isigisamik aallussisunut tunniunneqartarpoq.

Ukaleq Slettemark neriuppoq, marsimi junior cupertoqarnissaanut peqataaffigerusutaminut peqqissisimassalluni.

- Junioritut suli ukiuni pingasuni unammeqataasarnissanut unamminernullu allanut peqataasarnissannut ukiorpassuarnilu qujanartumik suli periarfissaqarpunga. Ullut ataasiakkaarakkit pilersaaruteqangaarsinnaanngilanga.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat