Ukaleq Slettemark IBU Senior Cupimi normu 10-nngortoq

18-inik ukiulik, Ukaleq Slettemark Norgemi IBU Senior Cupimi normu 10-nngorpoq. Taamaalilluni inersimasuni unammisartuni pitsaanerpaani siuariaateqangaatsiarluni.

Norgemi Sjusjøenimi unammipput, Ukaleq Slettemarkilu tassanilu ajugaasup 32-nik ukiullip, Irina Starykhip apuunneranit 56 sekundiinnarmik kingulliulluni apuuppoq.

- Angusara tupaallaatigeqaara. Pitsaanerpaanngilarli. Ooqattaasarnera ajunngilluinnartumik ingerlavoq, illiniliatigoorniinni ingerlalluartorujussuartut misigisimavunga, Ukaleq Slettemark oqarpoq.

AAMMA ATUARUK Timersornermik maligassiuisut nersorneqartut

 - Pitsaanerpaat 30-t akornanniinnissannut neriuuteqalaareersimavunga, pitsaanerpaalli qulit akornanniinnissara eqqarsaatiginngikkaluarparaluunniit. Pikkunaqaaq, inersimasut akornanni piginnaasaqarnerpaat qaangerpakka.

Ukaleq Slettemarkip angutaata, Øystein Slettemarkip, oqarnera naapertorlugu panimi angusai biathlonertartut akornanni uitsatigineqarpoq.

- 18-inik ukiullip inersimasuni angusarissaarnerpaat ilaanniittarnerat qaqutigoortuuvoq, ingammik inuusuttuaqqat sisoraaserluni ooqattaasartut nunanit tamalaaneersut eqqarsaatigalugit, Øystein Slettemark oqarpoq.

Ukaleq Slettemark inuusuttuaqqat akornanni sisoraaserluni ooqattaasaarnermi nunarsuarmi januaarimi pissartanngorpoq.