Ujarassiuutut siunnersuisarneq Nunatta nammineerluni isumagilerumaarpaa
Naalakkersuisut uuliasiornermut aatsitassaqarnermullu periusissisassaattut siunnersuut naapertorlugu nunatta paasissutissanik katersuivissaannik GeoSurvey Grønlandimik pilersitsinialersaarpoq.
Nunarput aatsitassarsiorfinngornissaanut tamanna pingaaruteqartoq, Aatsitassaqarnermut Naalakkersuisup Jens Erik Kirkegaardip oqaatigaa.
- Isumaqarpugut aatsitassarsiorfittut uuliasiorfittullu ineriartussagaanni pisariaqartoq taakkuninnga nammineq inatsisiliortup, misissuinerit, nunatsinni periarfissat, nunatsinnulu iluaqutaanissaa qulakkeerniarlugu nammineq aamma misissuisinnaaneq namminerlu misissuineq aqullugu, nunatsinninngaanniit pissusissamisoortoq, Jens Erik Kirkegaard oqarpoq.
Namminersorlutik Oqartussat GEUS ukiorpassuiarni suleqatigisarsimavaa.Suleqatigiinerli ajunngitsumik ingerlagaluartoq, Aatsitassaqarnermut Naalakkersuisup isumaqarpoq Nunarput nammineq misissuivimmik pilersitsisariaqartoq.
- Ilisimatusarnikkut ingerlatserusuttut assigiinngittut amerlasoorparpassuarnik aningaassaliisarput. Taakkulu aningaassaliissutit ullumikkutuut ingerlatsillugu GEUS-imut tuttarput. Nunatsinni nammineq taamaattoqalerutta taakku aningaasat aningaassaliissutaasartut nunatsinnut tuttalissagaluarput, Jens Erik Kirkegaard oqarpoq.
GEUS Danmarkimit aningaasarpassuarnik ullumi aningaasaliiffigineqartarpoq. Nunarput ujarassiuutigut siunnersuisarneq nammineerluni isumagilissappagu aningaasaliissutissat nammineq nassaariniartariaqalissavagut.
Uuliamit aatsitassanillu nunarput ullumikkut isertitarsuaqanngilaq, aningaasanullu inatsit maanna atuuttoq assigiinngitsutigut iluarsillattaarnikkut iluatsinneqarpoq. Taamaammat aatsitassanut tunngatillugu ujarassiuuttut siunnersuisarneq Nunatta nammineerluni isumaginnilernisssaanut, Jens Erik Kirkegaard isumalluarpoq.
- Nunatsinni paasissutissat tigummilerutsigit annertusarlugillu nutaajunerpaallu nunatsinni pigilerlugit aningaasaliisarnerit eqqarsaatigalugit imminut akileriartuaassaaq. Kisianni aamma misissuinerit assigiinngitsut annertusarneranni imminut akileriartuaasaaq, Jens Erik Kirkegaard oqarpoq.
Aatsitassaqarnermut Naalakkersuisup siunertaa ukiuni qaninnerni periaanaavoq.
- Piaartumik taanna ingerlakkusupparput, immaqa 2015-imiit imaluunniit 2016-imiik. Kisianni taanna saniatigut aningaasaliinnissaq qanoq ingerlanneqassanersoq apeqqutaajumaarpoq aamma aningaasaqarnermut inatsisissaq 2015-imoortoq apeqqutaaqataajumaarpoq, Jens-Erik Kirkegaard oqarpoq.
Namminersorlutik Oqartussat aamma GEUSip isumaqatigiissutaat ukioq manna qaanngiussaaq. Kirkegaardillu ilimagaa isumaqatigiissut sivitsoqqinneqarumaartoq. GeoSurvey Greenland-ip inerisarneqarnerani, paasissutissanik GEUS-miit pissarsisarneq taamaalilluni ukiuni arlalinni ingerlannaassaaq.
