Ujarassiorneq aallartilluariivippoq

-Aatsaat tassa soraarninngorama tamakku suliarerusulerpakka, misilittagaqarusullunga, tassami inuuninni paaserusutakka amerlanermik.

Rasmus Thomassenip qujaniarfigisorujussuuvaa Bjarne Ljungdal, ujarassiortartunut Peqatigiiffimmik aallartitsisoq, atuakkiorsimasorlu, Ivittuunimi tassunga atuartarsimagamik, assut ilinniarfigisimallugu Rasmus Thomassen unnersiorpoq.

Ukioq manna ujarassiornermi peqataassanersoq Rasmus Thomassen aperigatsinni oqarpoq, tamanna suli nalulluinnarlugu, isilli tappissut suli pigiginii, kisianni ukiut tamaasa isertitaqartassagaluaruni tamanna imminut kanngunarpallaassasoq.

Aningaasat siorna eqqukkani sumut atorsimanerai ilanngullugu apeqqutigaarput, unnersiorporlu 75-iliilluni inuuissiornerminut taakku atorsimallugit, ilaquttani qaaqqullugit, kisiannili ileqqaallaqqissuugami suli sinneqartut.

Arlaannik nutaanik nassaarsinnaanini neriuutigineraa aamma aperaarput, akivorlu:

-Ujarassiuut timmisartoqatigalugit qanittukkut Nuup kangerluaniikkama, pinnersaasiassamik nutaamik nassaareerpunga, kisianni suli avissiviginagu, sumiittulligooq nalunngilai.

Aatsitassanut Ikummatissanullu Pisortaqarfimmi ujarassiuutut sulisoq, Maj Pommer Bjerring, oqarpoq, Kalaallit Nunaanni innuttaasut ujarassiornerup tungaatigut ilisimasaqarluartut. -Tamakkulumi attaveqarfigilluarusuppavut, aamma paasitikkusuppavut Kalaallit Nunaanni sorpassuarnik nunarsuaq tamakkerlugu tuniniarneqarsinnaasunik peqarmat, tamakkulu aamma akitsoriartortut.

Ujaqqamik soqutiginarsinnaasumik nassaassagaluaruit, Aatsitassanut Ikummatissanullu Pisortaqarfimmut oktobarip aallaqqaataa nallertinnagu nassiunneqariissaaq. Ujaqqat tassani misissorneqartarput, nassitsisorlu misissuinerup inernerinik paasitinneqartarpoq.