Ujarassiorit ukiuni 20-issaani ingerlanneqalerpoq
Sinerissami ujarassiornermik soqutigisallit ujarassiornerat aallartiinnarsinnaanngorpoq. Ujarassiorit ukioq manna 20-issaanik ingerlanneqassaaq, akissarsiarineqarsinnaasullu 120.000 koruuninik naleqarput. Ujarassiornermi ajugaasoq akileraarutitaqanngitsunik 55.000 koruuninik akissarsisinneqassaaq.
Allattoq Oline I. Olsen
juulip 20-at 2009 15:43
Aatsitassanik akulinnik ujarassiorermut atatillugu nittartagaq nutaaq pilersinneqarpoq, ateqartoq www.ujarassiorit.gl
Tassani paasissutissat ujarassiornermi atorneqarsinnaasut alakkarneqarsinnaapput, soorlu atuagaq " Mineral-guide- prospekting for amatører" , kalaallisut ima nutserneqarsinnaasoq, aatsitassarsiornermik ilitsersuut, aallarterlaanut ujarassiorneq. Atuagaq taanna juulip qaammataani allakkerivinni tamani pissarsiarineqarsinnaalissaaq.
Ujarassiornermut atatillugu ujaqqamik nassiussiniaruit oktobarip aallaqqaataatinnagu nassiuteriissavat. Unaminnermullu peqataaniaruit soqutigisaralugu ujarassiortuussaatit, tassa inuussutissarsiutiginagu kiisalu kalaallit Nunaanni inuit allattorsimaffianni allassimasuussallutit.
