Ujarassiorit aqqutigalugu Nunarput avammut nittarsaanneqarsinnaavoq
Ujarassiorimmi ajugaasoq akileraaruteqaataasussaanngitsunik 55.000-it koruuninik akissarsiassaqarpoq, Tasiilameersorlu Vittus Sakæussen ukioq manna ajugaavoq.
Vittus Sakæussen ujarammik Tasiilap kujammut kippasissortaani Nagtivimmi qaarsumeersumik nassiussivoq. Qaarsoq taartuuvoq korundilik, tassa safiri aappalaarujuttoq.
Rubini Tunup kujataanit siornatigut nalunaarutigineqarnikuugaluarpoq, Tasiilalli eqqaani rubineqarneranik aatsaat takussutissamik nassaartoqarpoq.
Nunattalu aatsitassatigut pisuussutai pillugit aningaasartuutaavallaanngitsumik nittarsaassiniaraanni Ujarassiorit aqqutaasinnaalluartoq, Aatsitassanut naalakkersuisup Ove Karl Berthelsenip oqaatigaa.
Ujarassiorit ukioq manna aamma soqutigineqarluartoq taassuma oqaatigaa, ujaqqat nassiussat katillugit 955-iummata.
- Ujaqqat nassiussat ukiumut agguaqatigiissillugu 1000-it missaanniittarput, ukioq mannalu aamma soqutiginnittoqarluarluni.
Nassiussat ujarassiuunut aamma soqutiginaateqarluarput, taamaalillunilu nunatta pisuussutaanik nittarsaassinermut aningaasartuuteqarpiarani iluaqutaalluni , Aatsitassanut naalakkersuisoq Ove Karl Berthelsen oqarpoq.
Ujarassiuup Thomas Rasmussenip Siriuspatruljemi peqataanermini ujarassiuutut sulilernissani soqutigisarilerpaa, inuillu pinngortitamik nuannarisallit aamma taamaalersartut, taassuma maluginiarpaa:
- Nunap pissusianut soqutiginnilersitsinissaq, Ujarassiorimmi siunertaraarput. Inuit piniarlutik aallaaniarlutilluunniit Kalaallit Nunaanni angalaartartut tuttunik taamaallaat qinaasinatik nunamut qiviarlutik ujaqqanik soqutiginnilerlutik ujarlertalernissaat siunertaraarput, uatsinnut nassiussisarniassammata. Taamaalilluta uagut Aatsitassanut Ikummatissanullu pisortaqarfimmi annerusumik ilisimasaqalerniassagatta, ujarassiooq Thomas Rasmussen oqarpoq.
Ujarassiorimmi ajugaasoq Vittus Sakæussen ajugaanini nuannaarutigeqaa, tusagssiortunillu katersortitsinermi sianerfigineqarami nuannaaqaluni.
Kullorsuarmeersoq Jens Martin Jensen 250.00 koruuninik akissarsislluni ajugaasumut tilliuvoq. Ajugaasut pigajuattut marluk akissarsitinneqarput, tassaasut Narsameersoq Jonas Enoksen aamma Siorapalummeersoq Peter-Jakob hendriksen.
