VIDEO Ujarassiorit 2014
- Ajugaasoq Narsarmiuuvoq, 90-ikkut qiteqqunneraniit Ujarassiorimmut peqataasarpoq, 97-imilu akissarsiassat annerpaartaannik pissarsiaqarsimavoq. Kingornalu aamma akissarsiassat aappaannik eqqugaqarsimalluni, Andreas Uldum Aningaasaqarnermut Aatsitassanullu Naalakkersuisoq ilisaritsitsinermini oqarpoq.
- Aasat tamaasa angalaarnitsinni ujaasisarpugut, immaqaluunniit soorlu igajartorutta nerereerutta pisuttuarluta misissuisarpugut. Aamma angalalluta ingerlaarlutaluunniit ujarak manngertornitut isikkulik takugaangatsigu sangusarparput taavalu misissorlugu. Katserserujoortarpugut taamatut, Laura Jensen ukioq manna Ujarassiorimmi ajugaasoq KNR-imut oqarpoq.
Ujaqqallu Ujarassiortitsinermi ajugaassutaasut aatsitassanik akoqarluarput.
- Taakkua ujaqqat mineraliseringertaqarput, tassa aatsitassanik akoqarput, annikikkaluarlutik kisianni takutilluarpaat Narsap avannaani aamma maannamut nalusatsinnik sumiiffimmik nutaamik aatsitassaqarfiusumik peqarsinnaasoq, Jonas Petersen Namminersorlutik Oqartussani Ujarassiooq KNR-imut oqarpoq.
Aamma atuaruk ”Ujarassiorit” ukiut 26-ssaanni maanna ingerlanneqarpoq
Ajugaasitsinermi ujaqqat akui kisimik nalilersuinermi aallaaviusimanngillat.
- Ajugaasup ujaqqanik katersigami misissuilluarsimanera, qaarsumi ujaqqanik atasunik angisuunik nassissimammatigut, suminngaanneerfiinillu ersarissumik takutissimalluta, Jonas Petersen oqarpoq.
Ujaqqalli ajugaassutaasut aatsitassarsiornissamut aallaaviunissaat nalunarallarpoq.
- Siusippallaarujussuarpoq oqaatigissallugu pilerinaataa, kisianni takutilluarpaa sumiiffik taanna nassaarfigisimasaa ujarlerfigissallugu soqutiginartuusoq, Jonas Petersen KNR-imut oqarpoq.