Ujarassiorit 2012
Ujaqqallu pisortaqarfimmut nassiunneqartussat akeqanngitsumik nassiunneqarsinnaapput, nassiussinermilu atortut allakkerivimmi pissarsiarineqarsinnaallutik.
Qaammatinilu tulliuttuni sisamani ujarassiuut ujaqqanik atortussiassannik akulinnik nassaarsinnaagunik allakkerivikkullu akeqanngitsumik nassiussillutik Ujarassioriminngaannit akissarsitsinneqarsinnaapput.
-Nalunngilarput Kalaallit pinngortitami kusanaqisumi angalaarnermik nuannarisaqartuusut, taamaalillutillu ujarassiorsinnaasartut. Ukiut tamaasa ujaqqat misissugassat 500-t 1000-illu akornanni amerlassusillit tigusarpagut. Taakkulu pingajorarterutaat kemii atorlugu misissugassanngorlugit ingerlateqqittarpagut, Aatsitassanut pisortaqarfimmi, Geologi Lærke Thomsen oqaluttuarpoq.
Ukioq kingulleq ujarassiornermi ajugaasut ilaata nassaava guldimik akoqarpoq. Neriunarporlu nassaarfiusimasumi suli annertunerusumik nassaartoqarsinnaanissaa. Ukioq manna ajugaasumut akissarsiassaq anneq 55.000 koruuninik aningaasartaqarpoq, tamannalu peqataanissamut pissutissaalluarpoq.
-Ujarasiorit suleqatiginerasigut misissugassanik Kalaallit Nunaata sineriaanit tamanit pissarsisarpugut. Taamaalillutalu nassaarineqartut atorlugit misissugassanik nassaarfiusimasumi misissueqqissinnaasarpugut, Lærke Thomsen oqarpoq.
Ujarassiorit annerusumik uani atuagaqarfigiuk: www.ujarassiorit.gl