Ujarassiooq: Ilisimassavarput nunarsuarmi nukiit annersarimmatigut

Silap pissusaa pillugu ataatsimeersuarneq sapaatip akunnerata tulliani aallartissaaq. Ataatsimeersuarneq sioqqullu Minik Rosingip nunarsuarmi naalakkersuisut assigiinngitsut nunarsuup siunissaanut iliuusissaarutiinnarsimanerannit iliuuseqartoqarnissaanik ujartuivoq.

- Nassuerutigisariaqarparput nunarsuarmi inersimasortaalluta nunarsuarmilu nukiit annersarigaatigut ilisimassallugu. Taamaaligutta paasissavarput nunarsuup siunissaa aalajangigarigipput; siunissarpullu aalajangeriigaanngitsoq, allanngortinneqarsinnaasorli, ujarassiooq atuagassiamut Ingeniørenimut oqarpoq.

- Ilumoorpoq nunarsuup avatangiisia allanngortikkipput, tamannalu nukitsinnik ersersitsivoq. Taamaattumik iliuusissaarunnermik tunniutiinnarnermillu misigineq illua-tungaanut saatinneqartariaqarpoq, Minik Rosing oqarpoq.

Ataavartumik nukissiorneq nunarsuarmi atugaanerulertuuppat ullut naggatissaannik oqalunneq unikaallatsinneqarsinnaassagaluarpoq, Minik Rosing isumaqarpoq.

Minik Rosingilu silap pissusaa pillugu ataatsimeersuarnermi angusassat annertunissaannik ilimasunngikkaluarluni CO2-mik aniasitsinerup siunissami annikillineqarnissaanut neriulluarpoq.

- Naleqquttumik akeqartikkaanni aniasitsineq akigitinneqartoq aallaavigalugu annikillisinneqarsinnaavoq. Akitsuusit ilaat nunanut siuarsarniakkanut, ullumi nunat siuarsimanerit mingutsitsinerannit eqqugaasartunut, tutsinneqarnissaa pingaartuuvoq, Minik Rosing oqarpoq.

Aki tamanna ataatsimeersuarnermi, ataasinngorpat aallartittussami, eqqartorneqartussat ilagaat. Jens B. Frederiksen Anthon Frederiksenilu Kalaallit Nunaat sinnerlugu peqataassapput. Naalakkersuisut taakku ataatsimeersuarnerup sapaatip-akunnerata aappaani ilaalissapput, atorfillilli nunatsinneersut Danmarkimeersut peqatigalugit ataatsimeersuarnerup aallaqqaataaniilli isumaqatigiinninniarnernut peqataassallutik.