Ujarannguunnerit ulloriarsiornerlu frimærkiliarineqarput
Frimærkit taakku, ukiup Europa-seriaanik taaguuserneqartut, eqqumiitsuliortumit Ina Rosingimit suliaapput, ulloriarsiornermut tunngassuteqarlutik.
Ujaranngornikut assiliartaliullugit saqqummersitsisarnerit naggaserneqassapput frimærkiliullammaap kigartuisartup Martin Mörchip frimærkiliaanik pingasunik asseqanngilluinnartunik. Taakkunani takuneqarsinnaapput Kalaallit Nunaanni ukiut 200 millionit 8000-illu akornanni nalinginnaasumik piusimasut naasoq, uumasoq qituttoq aamma uumasoq qimerlulik.
Frimærkini 2009-mi saqqummersussani allani takuneqarsinnaavoq siku aliguusaq inunnik uumasunillu assiliartaligaq. Kalaallit Nunaata ilanngussaa taanna Julie Edel Hardenbergimit suliarineqarpoq. Nunarsuup kissakkiartornerata kinguneri tassani maluginiarneqassapput.
Frimærkinik 2009-mi Post Greenlandip saqqummiinera siulleq arfineq-marlunnik frimærkitaqarpoq.