Ujarak pisoqarsuaq kuisittumut tunniunniarpaa

januaarip 19-at 2006 11:04

Kunngissakkut ernerat arfininngorpat kuisippat ujaqqamik nunatsinnit anninneqarsimasumik tunissuteqarfiginiarneqalerpoq.

Danmarkimi qiperuisartoq Niels Christian Frandsen ujaqqamik, Nuup Kangerluani Isuakasianiittup nunarsuarmi ujaqqat pisoqaanersaata ilaanik, ukiut 20 matuma siornagut piikkaminik, nunatsinnillu annissimasaminik, kunngissap ernera arfininngorpat kuisippat tunissuteqarfigileraa, Danmarkimi aviisi Dagbladet allaaserisaqarpoq.

Ujarak Niels Christian Frandsen-ip Isukasiani peeriarlugu tigusimasaa Konglomerat-imik taaguutilik 50 kilo missaani oqimaassuseqarsimavoq, taannalu nunarsuarmi ujaqqat pisoqqanersaattut ilisimaneqartup ilagigaa Niels Christian Frandsen Dagblademi issuarneqarpoq.

Ukiut 20-it matuma siornagut Japanimiut ilisimatuuisa Isukasiani ujaqqap pisoqarsuup ilaanit misissugassaminik peersinialeramik Niels Christian Frandsen ujaqqanik pilattuinermik immikkut ilisimasaqartuummat piserisimavaat, taamanilu Niels Christian Frandsenip Japanimiut peersissutereeramigit ujaqqap ilaanik nammineq pissaminik peersisimavoq, ujarallu tigusani sakkuminut taarsiullugu sakkuusivimminiitillugu Danmarkimukaassimallugu oqaluttuarpoq.

Niels Christian Frandsen-ip ujaqqap tigusami ilaa tupilattut isikkoqalersillugu qiperorniarsimavaa, taamanilu kunngissaq Frederik kuisimmat tunniuttussaasimagaluarlugu, naammassinngitsooramiuk tunniutinngitsuuinnarsimallugu. Massakkullu kunngissap ernera kuisilermat qiperorlugu naammassigamiuk tunissutiginiarini oqaluttuarpoq.

Dagbladet allappoq Isukasia eqqissisimatitaalluinnartoq; Namminersornerullutilli Oqartussani Aatsitassanut Pisortaqarfimmit ilisimatitsissutigineqarpoq Isukasia eqqissisimatitaanngitsoq.

Niels Christian Frandsen taamani akuerisamik ilisimasassarsiortunut ilaalluni ujaqqamit peersivoq, namminerli atugassaminik peersinera erseqqarissumik inatsisitaqanngitsoq, Aatsitassanut Pisortaqarfik ilisimatitsivoq.

Nunatsinnut takornariat ujaqqanik assamminni taamaallaat tigumiarsinnaasaminnik annissisinnaatitaapput, assamminni tigummisinnaasaminnit annerusumik annisserusukkunik, Aatsitassanut Pisortaqarfimmut akuersissummik qinuteqaqqaartussaapput.